Хонандагони мактаб-интернати Рӯшон дар урдугоҳи «Чашмасорон» дам мегиранд

Хоруғ, 15.06.2016 /АМИТ «Ховар»/. Бо ибтикори Шӯрои иттифоқҳои касабаи вилоят 30 нафар аз хонандагони мактаб-интернати ҷумҳуриявии ноҳияи Рӯшон барои истироҳат ба урдугоҳи «Чашмасорон»  фиристонда шуданд. Раиси ин шӯро Марзия Некпаева гуфт, ки аксарияти ин  кӯдакону наврасон  аз оилаҳои ниёзманд ва ятим мебошанд ва имкони дамгирӣ дар истироҳатгоҳҳои музднокро надоранд. Аз ин рӯ, мо кӯшиш мекунем, ки дар се баст ҳамаи онҳоро ба истироҳати бофароғат ҷалб намоем.
Дар назди урдугоҳ  чашмаи шифобахш ҷойгир аст ва хонандагон баъди бозиҳои зеҳнию варзишӣ  ва фарҳангӣ метавонанд аз оби шифобахши ин чашма низ баҳра баранд. Оби чашмаи мазкур  барои касалиҳои устухон, миён ва дасту пой давои хуб аст. Яъне дар баробари дамгирӣ онҳо дар таътили  тобистона ҳамчунин саломатии худро барқарор месозанд.
Алъон наздики 10 истироҳатгоҳи мавсимӣ дар шаҳру ноҳияҳои вилоят ба қабули кӯдакону наврасон  омода мебошанд.