Иштирокдорони Бозиҳои олимпии Рио-2016 аз Тоҷикистон ба 10 нафар хоҳанд расид

Душанбе, 09.06.2016 /АМИТ «Ховар»/. То оғози Бозиҳои тобистонаи  олимпӣ дар Рио-де-Жанейрои Бразилия фурсати кам боқӣ мондааст. Ба ин хотир Кумитаи миллии олимпии Тоҷикистон тамоми кӯшишро ба харҷ медиҳад, ки шумораи иштирокдорони ин бозиҳо аз кишвари мо зиёд гардад. Муҳаммадшо Абдуллоев, директории генералии Кумитаи миллии олимпии Тоҷикистон ба «Ховар» гуфт:«То ҳол се нафар варзишгарони кишварамон ҳаққи иштирокро дар Бозиҳои тобистонаи олимпӣ ба даст оварданд ва мо кӯшиш дорем дар риштаи шиноварӣ 2 квота (1 мард ва 1 зан), дар намуди варзиши сабук 1 квота (зан) ва дар гӯштини тарзи озод як квотаи дигарро соҳиб шавем. Варзишгарони мо боз дар ду мусобиқаи тахассусӣ оид ба варзиши сабук ва бокс барои роҳхатҳои олимпӣ мубориза мебаранд.»
Ба ҳамин тартиб, охирин мусобиқаи литсензионӣ дар риштаи бокс, ки  варзишгарони Тоҷикистон барои роҳхатҳои олимпӣ мубориза мебаранд, ин мусобиқаи ҷаҳонии интихобии олимпӣ оид ба бокс байни мардон аст, ки аз 14-ум то 26-уми июн дар пойтахти Озарбойҷон- шаҳри Боку мегузарад. Ба қавли Муҳаммадшо Абдуллоев, дастаи мунтахаби Тоҷикистон қариб дар ҳамаи вазнҳо ширкат меварзад ва муштзанҳои маъруфи кишвар Ҷаҳон Қурбонов ва Анвар Юнусов, ки  таҷрибаи бои ширкат дар бозиҳои олимпиро доранд, имкони хуби ба даст овардани роҳхатҳоро соҳибанд. Агар дар вазни аз 91 кг боло танҳо ғолиб соҳиби роҳхати олимпӣ шавад, пас дар вазнҳои сабуку миёна боксчиёне, ки ҷойҳои аз якум то панҷумро мегиранд, ҳаққи ширкат дар Олимпиадаи Рио-2016-ро ба даст хоҳанд овард.
Ёдрас мешавем, ки Дилшод Назаров дар гурзпартоӣ, Комроншоҳи Устопириён ва Муҳаммадмурод Абдураҳмонов дар риштаи дзюдо соҳиби литсензияи олимпӣ буда, дар Бозиҳои тобистонаи имсола дар Рио-Де-Жанейрои Бразилия иштирок мекунанд.