Кодекси меҳнат дар таҳрири нав: Корманде, ки дар ҳолати мастӣ ба кор меояд, аз кор озод карда мешавад

Душанбе, 17.06.2016/АМИТ «Ховар»/. Кодекси меҳнати Ҷумҳурии Тоҷикистон аз ҷониби вакилони Маҷлиси намояндагон дар таҳрири нав қабул  гардид. Дар асоси сархати 6 қисми 1 моддаи 42, қисми 2 моддаи 50 ва сархати 3 қисми 1 моддаи 190 муқаррар карда шуд, ки агар корманд дар ҳолати мастӣ ба кор ҳозир шавад, дар ин сурат  корфармо ҳуқуқ дорад шартномаи меҳнатии коргарро бекор намуда, ӯро аз кор озод намояд.
Бояд тазаккур дод, ки лоиҳаи Кодекси меҳнати Ҷумҳурии Тоҷикистон бо тартиби ҳуқуқи ташаббуси қонунгузорӣ аз тарафи Президенти Ҷумҳурии Тоҷикистон ба Парлумон пешниҳод гардида,  он муносибатҳои меҳнатӣ,  ҳифзи ҳуқуқу озодиҳои инсон, ҳимояи манфиатҳои давлат, ташкилоту идораҳо, соҳибкорон ва дигар субъектҳои  муносибатҳои меҳнатӣ ва фароҳам овардани шароити зарурии ҳуқуқӣ ба онҳоро ба танзим медарорад.
Дар тарҳи нави Кодекси меҳнати Ҷумҳурии Тоҷикистон мафҳумҳои кори фосилавӣ (дистансионӣ), корманди хонагӣ, корманди хонакор, музокироти коллективӣ, созишнома, хизмати гражданӣ, хизматчии гражданӣ, шартномаи коллективӣ ва шахсони дорои уҳдадориҳои оилавӣ илова карда шуданд
Инчунин дар тарҳи нави Кодекси меҳнат боби 28 боби нав буда, меҳнати вакилони Маҷлиси намояндагони Маҷлиси Олии Ҷумҳурии Тоҷикистон, судяҳо, хизматчиёни ҳарбӣ, кормандони мақомоти ҳифзи ҳуқуқ ва дипломатӣ, инчунин дигар кормандони ташкилотҳои давлатӣ ва ғайридавлатиро ба танзим медарорад.