Маъмурияти дипломатии кордори Шоҳигарии Арабистони Саудӣ дар Тоҷикистон ба поён расид

Душанбе, 01.06.2016 /АМИТ «Ховар»/. 31 маи соли 2016 вазири корҳои хориҷии Ҷумҳурии Тоҷикистон Сироҷидин Аслов кордори Шоҳигарии Арабистони Саудӣ дар Ҷумҳурии Тоҷикистон Ҳамза Бахит ал-Ҳарбиро бино бар ба поён расидани маъмурияти дипломатияш дар Тоҷикистон ба ҳузур пазируфт.
Зимни суҳбат ҷонибҳо аз рушди бемайлони муносибатҳои Тоҷикистон ва Арабистони Саудӣ изҳори қаноатмандӣ намуда, бар идомаи талошҳои муштарак ҷиҳати иҷрои амалии тавофуқҳое, ки дар натиҷаи музокироти сатҳи олии ду кишвар моҳи январи соли равон дар Риёз ҳосил шуданд, таъкид карданд.
С.Аслов кордори Шоҳигарии Арабистони Саудиро барои фаъолияти пурсамар ва саҳми арзандааш дар рушду таҳкими муносибатҳои дуҷонибаи Тоҷикистон ва Арабистони Саудӣ бо Ифтихорномаи Вазорати корҳои хориҷии Ҷумҳурии Тоҷикистон сарфароз намуд.