Машқҳои наҷотдиҳандагони байнисарҳадӣ миёни Ҷумҳурии Тоҷикистон ва Ҷумҳурии Қирғизистон

          Душанбе, 4.06.2016 /АМИТ «Ховар»/. 2 июни соли равон дар шаҳри Хуҷанди вилояти Суғд вохурии дуюми минтақавӣ оид ба омодагӣ ба машқи байнисарҳадӣ миёни наҷотдиҳандагони Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ва Вазорати ҳолатҳои фавқулоддаи Ҷумҳурии Қирғизистон доир гардид.
Дар вохӯрӣ ҷонибҳо оид ба табодули иттилооту таҷриба миёни ҳампешагон, бартарафсозии ҳолатҳои фавқулодда дар минтақаҳои назди сарҳадӣ, расонидани кӯмакҳо бо ҷалби наҷотдиҳандагони касӣ мувофиқ ба мавзеи ҷуғрофии ҳолати фавқулоддаи баамаломада ва дигар масоили вобаста ба тақвияти ҳамкориҳо мавриди баррасӣ қарор гирифт. Ҳамзамон ҷонибҳо оид ба гузаронидани машқи байнисарҳадӣ миёни наҷотдиҳандагони ҳарду кишвар ба мувофиқа омода, нақшаи баргузории машқи мазкурро мавриди баррасӣ қарор доданд.