Носи Тоҷикистон ба ягон стандарти давлатӣ ҷавогӯ нест

Душанбе, 01.06.2016 /АМИТ «Ховар»/. «Масъалаи истеҳсол, фурӯш ва истеъмоли хокаи аз тамоку истеҳсолшуда, яъне нос ягон стандарти давлатӣ, регламент ва тарзи тайёр кардан надорад.  Дар  ҳар маҳал носро бо ҳар тарз истеҳсол мекунанду бо  ҳар бренд  мефурӯшанд»,- гуфт муовини вазири тандурустӣ ва ҳифзи иҷтимоии аҳолӣ Навруз Ҷаъфаров зимни конфронс бахшида ба Рӯзи ҷаҳонии бидуни тамоку.
Бино ба маълумоти Н.Ҷаъфаров,  соли  2014  барои муайян кардани таркиби нос, чанд намуди нос аз ҳар минтақаи кишвар  ба Амрико ва Русия барои ташхис ва таҳқиқ фиристода шудааст. Пас аз ташхис муайян гардид, ки  он маводи кимёвие,  ки дар нос аст, ҳатто дар таркиби  сигор нест.
«Таркиби нос 10 маротиба бештар маводи кимёвии зараровару заҳролуд дорад. Металлҳои вазнине, ки дар таркиби носанд,  аз ҷумла  малибден, сурб, ишқорҳо  ва ғайра,  пардаи луобии даҳонро вайрон мекунанду металлҳои вазнин ба бемориҳои саратон  ва захми меъда оварда мерасонанд. Дар минтақаҳои кӯҳии кишвар  барои тайёр кардани нос хокистари дарахти арча истифода мешавад. Дар шаҳрҳо оҳак ва ё хокистари поруи паррандагонро истифода мекунанд»,-илова намуд муовини вазир.
Бино ба  таҳлилҳои гузаронидаи  ТУТ 8,7 % мардони аз 15 то 59 сола  дар Тоҷикистон тамоку мекашанд. Ин нишондод нисбат ба занон 0% мебошад. Ҳол он ки қариб 40% мардон  ва 3% занҳое, ки дар деҳоти кишвар  умр ба сар мебаранд,  нос мекашанд.
Мутахассисони соҳаи тиб дар он андешаанд, ки сабаби зиёд истеъмол кардани нос дар арзонӣ  ва дастрасии он мебошад.