Оилаи солим-шоҳсутуни асосии давлатдорӣ

Душанбе, 01.06.2016 /АМИТ «Ховар»/. Дар факултаи рақами 4-и Академияи Вазорати корҳои дохилии Ҷумҳурии Тоҷикистон дар шаҳри Хуҷанд дар мавзӯи «Оилаи солим шоҳсутуни асосии давлатдорист» конфронси илмию амалӣ баргузор шуд.
Тавре ки аз Вазорати корҳои дохилии кишвар хабар доданд, дар кори конфронс  садорати муассисаи таълимӣ, омӯзгорону курсантон ва шунавандагони Академия иштирок намуданд.
Муовини сардори Академияи ВКД Ҷумҳурии Тоҷикистон, сардори факултаи рақами 4 Назарзода Носир Ҷобир зикр кард, ки оила яке аз қадимтарин унсурҳои иҷтимоӣ дар таърихи башарият ба шумор меравад. Аз ин рӯ, оилаи солим ҳастии ҳар як миллат ва бақои фарҳангу тамаддуни инсонӣ мебошад.
Дар мавзӯъҳои «Оилаи солим  шоҳсутуни асосии давлатдорист», «Никоҳ аз нигоҳи Ислом ва қонунгузории Ҷумҳурии Тоҷикистон», «Мубориза бар зидди зӯроварӣ дар оила», «Фаъолияти якҷояи оила, мактаб ва аҳли ҷамъият дар тарбияи насли наврас» маърӯзаҳо шунида шуданд.
Зикр гардид, ки оилаи солим метавонад заминаи мусоиди ҳастии миллатро таъмин намудаву имконияти воқеии арзи ҳастӣ намудани онро ҳамчун миллати солиму устувор ва побарҷову ояндадор кафолат диҳад.
Ҳамчунин дар конфронс ба намоиш гузоштани тасвир-слайдҳо дар мавзӯъҳои «Оилаи солим, фарзанди солим, ояндаи солим» ва «Оилаам осудаву ҷамъи ҷаҳон осуда аст» инъикосгари мавзӯъҳои меҳварии конфронс ба шумор мерафт.