Омодагии шаҳрвандони тоҷик ба ҷашни Ваҳдати миллӣ ва 25- солагии Истиқлолияти Ҷумҳурии Тоҷикистон дар вилояти Новосибирск

Душанбе, 4.06.2016 /АМИТ «Ховар»/. Ҳамватанони дар шаҳру вилоятҳои Федератсияи Русия будаамон барои дар сатҳи баланд  гузаронидани маъракаҳои муҳими сиёсӣ, аз қабили таҷлили Рӯзи Ваҳдати миллӣ ва ҷашни 25-солагии Истиқлолияти Ҷумҳурии Тоҷикистон омодагӣ дида истодаанд. Таҷлили ин ҷашнҳо аз дарки баланди худшиносиву ватандӯстии ҳамватанонамон дар шаҳри Новосибирск ва минтақаи Сибир дарак медиҳанд,- иброз дошт зимни суҳбат раиси ҷамъияти минтақавии тоҷикон бо номи «Дӯстӣ»-и вилояти Новосибирск Сияршо Абдуҷабборов.

Ҳамчунин ӯ илова намуд, ки мо бо аъзои фаъоли ҷамъияти тоҷикон ва соҳибкорони муваффақи тоҷик тасмим гирифтем бахшида ба ин ду ҷашни бузург дар  моҳи июл мусобиқаи калони гӯштингириро бо ширкати васеи паҳлавонони  Русия ва Тоҷикистону дигар кишварҳои Осиёи Марказӣ баргузор намоем, зеро гӯштин яке аз намудҳои  варзиши асосиву дӯстдоштаи мардуми мо ба ҳисоб рафта, рамзи сарбаландиву самимият ва  муттаҳидиву ҷавонмардии мардуми тоҷик мебошад.

Дар назар аст, ки овозхонҳои машҳури саҳнаи тоҷик дар базми идона ширкат варзида, бо суруду таронаҳои ватандӯстонаву марғуб хотири ҳазорҳо ҳамватанонро шод намоянд.

Садбарг Боқиева;-Новосибирск.