Озмуни «Андалеб-2016» дар шаҳри Хуҷанд ҷамъбаст гардид

Хуҷанд,  03.06.2016. /АМИТ «Ховар»/. Дирӯз дар Театри тамошобини навраси шаҳри Хуҷанд даври шаҳрии озмуни ҷумҳуриявии телевизионии эҷодиёти халқ «Андалеб-2016» бо баргузор намудани чорабинии калони фарҳангӣ ҷамъбаст гардид. Қабл аз оғози чорабинӣ фарҳангиёни шаҳр дар саҳни театр намоиши ҳунарҳои халқӣ, аз ҷумла намоиши нигораҳои осорохонаи шахсии шаҳрванд Нозимҷон Усмоновро ташкил карданд, ки аз онҳо раиси шаҳр Шариф Шарифзода ва ҳамроҳонаш дидан карда, изҳори қаноатмандӣ намуданд.
Пас аз шиносоӣ бо намоиши ҳунарҳои халқӣ Шариф Шарифзода гуфт, ки мардуми сарбаланди Хуҷанд ҳанӯз фарҳанги ниёгон ва расму суннатҳои қадимии хешро фаромӯш накардаанд ва бобати ҳифз ва сайқал додани он кӯшиш ба харҷ медиҳад. Ва дар ин робита итминон дорам, ки аҳли фарҳанги шаҳри Хуҷанд дар даври ҷумҳуриявии озмун низ бо маҳорати баланд баромад карда, мақоми арзандаро соҳиб хоҳанд шуд.
Сипас, дар қисми тантанавӣ аз ҷониби раиси шаҳр ба ғолибони озмун Сипоснома ва мукофотҳои пулӣ тақдим карда шуданд.
Тибқи хулосаи ҳакамон дар озмуни шаҳрӣ ҷойи аввалро Коллеҷи санъати ба номи Содирхон Ҳофиз ишғол карда, соҳиби Сипосномаи раиси шаҳр ва мукофоти пулӣ ба маблағи 5000 сомонӣ гардид.
Ҷойи дуюмро донишҷӯёни Донишкадаи политехникии Донишгоҳи техникии Тоҷикистони шаҳри Хуҷанд соҳиб шуда, бо Сипосномаи раиси шаҳр ва мукофоти пулӣ ба маблағи 3000 сомонӣ сарфароз шуданд.
Ҷойи сеюмро донишҷӯёни ДДҲБСТ ишғол карда, соҳиби Сипосномаи раиси шаҳр ва 2000 сомонӣ мукофотпулӣ шуданд.
Ҳамчунин барои иштироки фаъолона донишҷӯёни ДДХ ба номи академик Б.Ғафуров, Коллеҷи омӯзгории ин донишгоҳ ва Коллеҷи тиббии шаҳри Хуҷанд бо сипосномаҳои раиси шаҳр сарфароз гардиданд.