«Пешгирии зӯроварӣ дар оила»- машварат дар Академияи ВКД

Душанбе, 16.06.2016 /АМИТ «Ховар»/. Дирӯз дар Академияи Вазорати корҳои дохилии Ҷумҳурии Тоҷикистон машварати илмии ғайринақшавии кафедраи ҳуқуқи маъмурӣ ва фаъолияти маъмурӣ дар мавзӯи «Пешгирии зӯроварӣ дар оила» бахшида ба 25-умин солгарди Истиқлолияти давлатии Ҷумҳурии Тоҷикистон баргузор шуд.
Тавре аз Вазорати корҳои дохилии Ҷумҳурии Тоҷикистон хабар доданд, дар он намояндагон аз мақомоти корҳои дохилӣ, Кумитаи ҷавонон варзиш ва саёҳии назди Ҳукумати Ҷумҳурии Тоҷикистон, Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон, Кумитаи кор бо занон ва оилаи назди Ҳукумати Ҷумҳурии Тоҷикистон ва Донишгоҳи (славянии)  Русия ва Тоҷикистон иштирок намуданд.
Дар ҷамъомад дар мавзӯъҳои «Хусусияти оилавӣ аз дидгоҳи Қуръон ва ҳадис», «Баъзе проблемаҳои қонунгузории Ҷумҳурии Тоҷикистон оид ба пешгирии зӯроварӣ дар оила», «Ҳамкорӣ баҳри аз байн бурдани зӯроварӣ дар оила», «Асосҳои ҳуқуқии пешгирии зӯроварӣ дар оила», «Амрномаи муҳофизатӣ ҳамчун чораи фардии пешгирии зӯроварӣ  дар оила»  маърӯзаҳо шунида шудаанд.
Мақсад аз баргузории машварат, пеш аз ҳама, баррасии мавзӯъҳои муҳиме, ки дар ҷомеа нигаронкунандаанд, аз ҷумла зӯроварӣ дар оила ва пешгирии он, мақоми зан, ҳифзи ҳуқуқҳои оиладорӣ, санадҳои меъёрию ҳуқуқӣ дар ин самт, баланд бардоштани сатҳи касбияти нозирони милитсия ва мустаҳкам намудани  ҳамкорӣ бо ҷомеа буд.