Семинари омӯзишии кормандони муваққатии марказҳои имтиҳонӣ

Душанбе, 01.06.2016 /АМИТ «Ховар»/. Аз 1-ум то 11-уми июни соли равон дар 15 шаҳру ноҳияи интихобшудаи ҷумҳурӣ семинарҳои омӯзишии кормандони муваққатии марказҳои имтиҳонӣ баргузор хоҳанд шуд. Курсҳои омӯзишии мазкур дар 20 нуқта тибқи барнома ва модули омӯзишӣ гузаронида мешаванд.
Барои иштирок дар семинарҳо қаблан 3640 нафар ҳуҷҷат супорида буданд, ки аз ин шумора тибқи талабот ва арзёбии пешакӣ зиёда аз 2 ҳазору 200 нафар ба омӯзиш ҷалб шудаанд. Дар марказҳои имтиҳонӣ, ки аз ҷониби Вазорати маориф ва илми Ҷумҳурии Тоҷикистон тасдиқ карда шудааст, аз шумораи шахсони дар семинарҳо иштироккарда зиёда аз 1900 нафар ба кори муваққатӣ ҷалб хоҳанд шуд.
Бояд тазаккур дод, ки семинарҳои омӯзишӣ барои 81 гурӯҳ аз ҷониби 46 нафар-  26 тренер, ки Марказ қаблан онҳоро тибқи озмун интихоб карда, омӯзонидааст, инчунин 20 корманди худи Марказ баргузор мегарданд.