ҶСП «Спитамен Бонк» қарзи ипотекиро барои шахсони ҳуқуқӣ, соҳибкорони инфиродӣ ва шахсони воқеӣ фаъол мекунад

Душанбе, 01.06.2016. /АМИТ «Ховар»/. Аз якуми июн ҶСП «Спитамен Бонк» қарзи ипотекиро ба роҳ мемонад, ки барои шахсони ҳуқуқӣ, соҳибкорони инфиродӣ ва шахсони воқеӣ пешбинӣ шудааст.
«Ин маҳсулро мо барои пешниҳоди роҳҳои дастраси ҳалли масоили вобаста ба манзил, ки яке аз масъалаҳои афзалиятнок барои аксари мардум ба ҳисоб меравад, аз ҷумла оилаҳои серфарзанд, навхонадорон    ва шахсони бо хешовандони наздик мезиста, ки мехоҳанд соҳиби хонаи худ бошанд, ба роҳ мемонем. Тавре маълум аст, на ҳама вақт имконияти якбора ҷамъ кардани маблағи зарурӣ барои хариди хона мавҷуд аст. Роҳи хуби ҳалли ин масъала метавонад қарзи ипотекии бонки мо шавад», — гуфт муовини аввали раиси Раёсати ҶСП «Спитамен Бонк» Умедҷон Ҳикматов ба хабарнигори АМИТ «Ховар».
Бино ба гуфтаи У.Ҳикматов, ин қарзро на танҳо барои хариди хона, балки бо мақсади таъмири манзил низ гирифтан мумкин аст.
ҶСП «Спитамен Бонк» дар байни ҳадафҳои афзалиятнокаш, ба воридсозии маҳсулоти наву хизматрасониҳои инноватсионӣ диққати махсус медиҳад. Воқеан интихоби дурусти маҳсулоти молиявӣ, хизматрасонии босифату зуд, инчунин устуворию эътимоднокии  бонк гарави муваффақияти мизоҷон мебошад.