Тоҷикистон танҳо аз ибтидои солҳои 2000-ум ба марҳалаи рушд ворид гардидааст

Душанбе, 21.06.2016 /АМИТ «Ховар»/. Дар доираи Стратегияи миллии рушд дар ҳудуди мамлакат 2000 километр роҳҳои автомобилгард, 132 километр хатти роҳи оҳан, 200 адад пул ва 31 километр нақб бунёду таҷдид гардида, ба истифода дода шуданд. Ин нуктаро зимни суханронии хеш дар ҷаласаи Шӯрои миллии рушди назди Президенти Ҷумҳурии Тоҷикистон Пешвои миллат, муҳтарам Эмомалӣ Раҳмон ба иштирокдорони ҷаласа таъкид намуда, чунин илова кард: «Тавассути бунёд ва таъмири роҳҳо, пулу нақбҳо ва дигар инфрасохтори нақлиётӣ рафтуомад, боркашонӣ ва тиҷорати дохиливу байналмилалӣ осон ва дастрас гардид, ки ҳамаи ин барои аз бунбасти коммуникатсионӣ баромадани мо мусоидат намуд».
Хотиррасон мешавем, ки имрӯз дар Душанбе ҷаласаи Шӯрои миллии рушд бо иштироки аъзои Шӯро, роҳбарони вазорату идораҳои дахлдори мамлакат, намояндагон ва коршиносони Шӯрои ҳамоҳангсозии рушд ва ташкилоту созмонҳои байналмилалию ғайридавлатӣ баргузор гардид, ки дар кори он Асосгузори сулҳу Ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иштирок ва суханронӣ намуд.
Дар ҷаласаи Шӯрои миллии рушд «Стратегияи миллии рушди Ҷумҳурии Тоҷикистон барои давраи то соли 2030» ва «Барномаи миёнамуҳлати рушди Тоҷикистон барои солҳои 2016-2020» баррасӣ гардид.
Дар ҷаласа зикр гардид, ки то аввали солҳои 2000-ум тамоми неру ва талошҳои Ҳукумати кишвар барои таъмини сулҳу субот, барқарор кардани сохти конститутсионӣ ва фаъолияти рукнҳои давлатдорӣ, ба Ватан баргардонидани фирориён ва таъмини ваҳдати миллӣ равона шуда, танҳо аз аввали солҳои 2000-ум марҳалаи рушд оғоз гардида, пешрафти босуботи иқтисодӣ, беҳтар намудани сатҳу сифати зиндагии мардум тавассути суръат бахшидани корҳои бунёдкориву созандагӣ, сохтмону таҷдиди инфрасохтори нақлиётӣ, энергетикӣ, иҷтимоӣ ва татбиқи ислоҳоти фарогир дар соҳаҳои гуногун таъмин карда шудааст.