Вохӯрӣ бо сарбозон дар шаҳри Ваҳдат

Ваҳдат, 22.06.2016 /АМИТ «Ховар»/. Дирӯз бахшида ба ҷашни Ваҳдати миллӣ Кумитаи иҷроияи Ҳизби Халқии Демократии Тоҷикистон дар шаҳри Ваҳдат бо ҳайати шахсии қисми ҳарбии навтаъсиси Вазорати мудофиаи Ҷумҳурии Тоҷикистон вохӯрии судманд доир гардид.
Дар вохӯрӣ раиси Кумитаи иҷроия Руқия Раҳматзода зикр намуд, ки бо шарофати ба имзо расидани ин Созишномаи тақдирсоз мо тавонистем, ки ба мунокишаҳои дохилӣ ва муқовимати мусаллаҳона хотима бахшида, ба марҳалаи навини Тоҷикистон-  гузоштани пойдевори сулҳ, таъмини Ваҳдати миллӣ ва дар ин асос ба эътидол овардани фаъолияти соҳаҳои хоҷагии халқи Тоҷикистон ва рушди онҳо оғоз намоем. Ваҳдати миллӣ ҳамчун омили муттаҳидсозандаи тамоми мардуми Тоҷикистон шароит фароҳам овард, ки бо истифодаи арзишҳои аз ҷониби ҷомеаи ҷаҳони эътирофшуда дар ҷумҳуриамон таҳкурсии ташаккули ҷомеаи шаҳрвандӣ гузошта шавад ва барои андаке бошад ҳам, беҳтар гардидани сатҳи зиндагии мардум, ободӣ ва ояндаи давлати соҳибистиқлоламон заминаи мусоид муҳайё гардад.
Ба миллати тоҷик борҳо хатари парокандагию нобудӣ таҳдид карда, давлатҳои эҷодкардааш рӯ ба завол шуда, вале дар тӯли бештар аз ҳазор сол худро наҷот дода, то ба Истиқлолияти миллию давлатӣ расид.
Дар охир ба сарбозон маводи варзишӣ туҳфа намуданд.