Дар ноҳияи Айнӣ баъди таъмиру навсозӣ бинои шўъбаи касалиҳои сироятӣ мавриди истифода қарор дода шуд

Душанбе, 7.07.2016 /АМИТ «Ховар»/. Дар ноҳияи Айнӣ шўъбаи касалиҳои сироятӣ бо харҷи қариб 900 ҳазор сомонӣ бо фармоиши Идораи сохтмони асосии ноҳия азнавсозӣ гардида, барои табибони беморхонаю беморон шароити корию табобати саривақтӣ фароҳам оварда шуд. Дар ин бора ба АМИТ «Ховар» аз хадамоти матбуоти Мақомоти иҷроияи ҳокимияти давлатии вилояти Суғд хабар доданд. Гуфта мешавад, ки беморхонаи нав имконият хоҳад дод, то дар як рўз ба аз 100 то 150 нафар бемор хизмати тиббӣ расонида шавад.
Барои ташхису муолиҷаи хуби беморон аз тарафи Мақомоти иҷроияи ҳокимияти давлатии вилояти Суғд ба шўъбаи касалиҳои сироятии Беморхонаи маркази ноҳия таҷҳизоти нав тақдим гардид. Бино ба гуфтаи корманди ҷавони беморхона Нилуфар Мустафоева, муҳаё гардидани чунин шароити замонавӣ дар марказ ин аз рушди соҳаи тандурустӣ ва таваҷҷўҳи Ҳукумати ҷумҳурӣ ба солимии ҷомеаро нишон медиҳад.