Деҳқонони ноҳияи Лахш сокинони ҷумҳуриро бо картошкаи хушсифат таъмин менамоянд

Лахш, 14.07.2016 /АМИТ «Ховар»/. Шуғли асосии кишоварзони ноҳияи Лахш картошкапарварӣ буда, онҳо ҳамасола аз майдонҳои 500 гектараи Ҷиргатол, Лахш, Бӯстон ва Қизилсу ҳосили фаровон истеҳсол намуда, сокинони ҷумҳуриро бо картошкаи хушсифат таъмин менамоянд. Имсол 8 ҳазору 729 нафар саҳмдорони 1 ҳазору 668 адад хоҷагиҳои деҳқонии ноҳия дар майдони беш аз 2 ҳазор  гектар картошка кишт кардаанд.
Тибқи иттилои деҳқонони ботаҷрибаи ноҳияи Лахш, соли ҷорӣ бо мусоид омадани обу ҳаво ва кишти тухмиҳои хушсифату сари вақт бо ғизо ва об таъмин намудану нигоҳубини доимии киштзор нашъунамои қитъаҳои картошка хуб мебошад, ки он аз заҳмати шабонарӯзии деҳқонон шаҳодат медиҳад.
Ҳамасола масъулини ташкилоту идораҳои дахлдор ченаки ягонаи кишти картошка мегузаронанд, ки роҳбарони хоҷагиҳои кишоварзӣ ба изофанависӣ роҳ надиҳанд ва хушбахтона соли гузашта, аз майдони панҷсад гектараи дашти Ҷиргатол то 550 сентнер ҳосил гирифтаанд.