«Ҳосилот»-и Фархор ҳам сармураббиашро иваз кард

Душанбе, 15.07.2016. /АМИТ «Ховар»/. «Ҳосилот»-и Фархор сеюмин дастаест, ки  ҳафтаи равон сармураббии худро иваз мекунад. Аз ин пештар дастаҳои «Истиқлол» ва «Хуҷанд» аз иваз кардани сармураббиёнашон хабар дода буданд.
Муҳаммадҷон Ҳабибуллоев, яке аз мураббиёни маъруфи кишвар, ки соли гузашта «Ҳосилот»-и Фархорро ба гирифтани медалҳои тиллои Лигаи якум сазовор гардонида буд, аз нав ба мансаби сармураббигии ин даста баргашт.
Дар ин бора ба АМИТ «Ховар» Нурулло Маҳмудов, сардори дастаи «Ҳосилот» хабар дод.
Ба Муҳаммадҷон Ҳабибуллоев, Маъруф Рустамов ва Алиёр Ашӯрмаҳмадов, ки дар марҳалаи аввал ба «Ҳосилот» машқ додаанд, кумак мерасонанд.
Ҳамчунин хабар дода мешавад, ки дар марҳалаи дуввум аъзои дастаи мунтахаби Тоҷикистон Эраҷ Раҷабов аз дастаи «Хайр» ва Ойбек Абдуғаффоров аз «Барқчӣ» ба ҳайати дастаи «Ҳосилот» гузаштаанд ва то охири мавсим бозӣ хоҳанд кард.