Бунёди маҷмааи фарҳангию фароғатӣ дар ноҳияи Бобоҷон Ғафуров

Душанбе, 30.08.2016. /АМИТ «Ховар»/. «Бо дастгирию таваҷҷуҳи ҳамешагии Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соҳаи фарҳанг дар ноҳия ба пешрафтҳо ноил мегардад. Ин дастгириҳо ва муҳайё намудани шароит аҳли фарҳангро вазифадор менамояд, ки дар роҳи иҷрои рисолати муҳими миллӣ, дар зеҳни насли наврас ва ҷавонон решадор сохтани ҳисси миллӣ, ватандӯстиву ватанпарварӣ ва ба раванди ободониву созандагӣ даъвату сафарбар намудани мардум кӯшиши бештар намоянд». Ин матлаб дар маросими ба истифода додани маҷмаи фарҳангию фароғатӣ дар ноҳияи Бобоҷон Ғафуров зикр гардид.
Аз рӯи лоиҳа саҳни бинои бахши фарҳангӣ, ки масоҳати як гектарро ташкил медиҳад, навсозӣ шуда, дар ин ҷо бо ороиши хоса, чароғонкунии мавзеъ ду фаввораи нав ва гулгашти зебо бунёд гардидаанд. Корҳои сохтмонӣ дар ин иншоотро 30 нафар мутахассисони маҳаллӣ бо ҷалби 6 техникаи корӣ бо дастгирии Мақомоти иҷроияи ҳокимияти давлатии вилояти Суғд ва маблағгузории Мақомоти иҷроияи ҳокимияти давлатии ноҳияи Б.Ғафуров анҷом доданд.
Дар ноҳия 55 иншооти фарҳангӣ мавҷуданд ва давоми 2 соли охир аксари клубу китобхонаҳо таъмиру навсозӣ карда шуда, дар онҳо шароити кору хизматрасонӣ фароҳам оварда шудаанд. Навсозии Қасри фарҳанг ва бунёди маҷмаи фарҳангию фароғатӣ бо тарҳу усули хоса ба маркази ноҳия симои тоза бахшида, барои рушди фарҳанг заминаю шароити мусоид фароҳам овард.