Файзобод: 341 нафар тибқи квотаи президентӣ таҳсил доранд

Файзобод, 26.09.2016. /АМИТ «Ховар»/. Соҳаи маориф дар ноҳияи Файзобод дар тӯли 25 соли Истиқлолияти давлатӣ рушд намуда, ба муваффақиятҳои назаррас ноил гардид. Соли 1991 шумораи умумии муассисаҳои таҳсилоти умумии ноҳия дар якҷоягӣ бо 22 муассисаи ҳудуди шаҳри Роғун 65 ададро ташкил медод. Имсол ин шумора танҳо дар ноҳия ба 58 адад расидааст, ки нисбат ба солҳои аввали истиқлолият 15 адад зиёд мебошад. Айни замон дар ноҳия 40 муассисаи таҳсилоти миёнаи умумӣ, 10 муассисаи таҳсилоти асосӣ ва 8 муассисаи таҳсилоти ибтидоӣ фаъолият менамоянд.
Соли таҳсили 2015-2016 дар муассисаҳои таълимии ноҳия 1222 нафар омӯзгор, аз ҷумла 504 нафар зан фаъолият намуданд, ки тибқи иттилои масъулин соли равон шумораи омӯзгорон нисбат ба соли 1991 417 нафар афзудааст. Инчунин дар ин давра ҷиҳати ҳавасманд гардонидани омӯзгорон 243 нафар омӯзгор бо Ифтихорномаи Вазорати маориф ва илм ва нишони «Аълочии маорифи Тоҷикистон», 4 нафар бо медали «Хизмати шоиста» ва 7 нафар бо унвони «Корманди шоиста» сарфароз гардонида шуданд.
Бо мақсади бо кадрҳои дорои маълумоти олӣ таъмин намудани соҳаҳои гуногуни хоҷагии халқи ноҳия имрӯзҳо 2489 нафар донишҷӯён дар муассисаҳои таҳсилоти олии кишвар таҳсил менамоянд, ки аз онҳо 341 нафар тибқи квотаи Президенти Ҷумҳурии Тоҷикистон таҳсил доранд, ки аз ин шумора 232 нафарро духтарон ташкил медиҳанд.