Машварати корӣ оид ба такмили низоми аҳдномаи никоҳ

Душанбе, 23.09.2016 /АМИТ «Ховар»/. Бо ташаббуси шуъбаи кор бо занон ва оилаи мақомоти иҷроияи ҳокимияти давлатии шаҳри Кӯлоб дар мавзӯи «Такмили низоми татбиқи аҳдномаи никоҳ дар Тоҷикистон» машварати корӣ барпо гардид.
Тавре аз шуъбаи иттилоотию таҳлилии мақомоти иҷроияи ҳокимияти давлатии вилояти Хатлон иттилоъ доданд, дар машварат намояндагони шуъбаҳои кор бо занон ва оила, ҷавонон, варзиш ва сайёҳӣ, оид ба корҳои дин, маорифу тандурустӣ, сабти асноди ҳолати шаҳрвандӣ, ҷомеаи шаҳрвандӣ, аҳли зиё ва фаъолони шаҳри Кӯлоб ширкат доштанд.
Бояд гуфт, ки машварат мавзӯъҳои татбиқи амалии аҳдномаи никоҳ, устувории оилаҳои ҷавон, пешгирии никоҳи хешовандони наздик, оиладоршавии бармаҳал, ҳифзи иҷтимоии занону фарзандон баъди талоқ ва дигар масоили мубрами рӯзро вобаста ба муносибатҳои оиладорӣ дар бар гирифт.
Бино ба маълумоти манбаъ, масъулину коршиносони соҳа ҳолатҳои мазкурро муҳокима карда, ҷиҳати татбиқи амалии сиёсати давлатӣ дар байни занону оилаҳо ва тадриҷан рушд додани муносибатҳои неки оиладорӣ дар асоси суннатҳои миллӣ ақидаҳои хешро иброз доштанд.