Намоиши мусаввараҳои рассоми шинохтаи тоҷик Зоир Мирзоев дар толори Галереяи санъати муосири Тоҷикистон

Душанбе, 2.09.2016 /АМИТ «Ховар»/. 1-уми сентябр бахшида ба 25- солагии Рӯзи истиқлолияти Ҷумҳурии Тоҷикистон дар толори Галереяи санъати муосири Тоҷикистон, ки дар ошёнаи сеюми Маркази бузурги савдои «Ашан» (Душанбе Мол) ҷойгир аст, намоиши мусаввараҳои рассоми шинохтаи тоҷик Зоир Мирзоев баргузор гардид.
Тавре ба АМИТ «Ховар» аз дафтари матбуоти Галереяи санъати муосири Тоҷикистон хабар доданд, дар намоишгоҳ таҳти унвони «40 соли эҷодиёт» 83 мусаввараи рассом, ки тӯли ин солҳо эҷод шудаанд, ба намоиш гузошта шудаанд. Дар расми ифтитоҳи намоиши асарҳои рассоми тоҷик вазири фарҳанги Тоҷикистон Шамсиддин Орумбекзода, директори Галереяи санъати муосири Тоҷикистон Инна Непомняшая ва дигарон сухан гуфтанд.
Бояд гуфт, ки асарҳои рассоми тоҷик Зоир Мирзоев, ки дар жанрҳои мухталифи манзараву чеҳранигорӣ ва тарҳу натюрморт офарида шудаанд, бинандаро бо дунёи зебои тоҷикон ва меҳани кӯҳистони мо шинос мекунанд.
Дар маросими ифтитоҳи намоиш вазири фарҳанги Тоҷикистон Шамсиддин Орумбекзода рассоми тоҷик Зоир Мирзоевро барои хизматҳои беназираш дар бахши фарҳанг бо нишони сарисинагии «Аълочии фарҳанги Ҷумҳурии Тоҷикистон» сарфароз гардонид.