Суди конститутсионӣ баъзе сархатҳои Оинномаи КВД «Нақлиёти автомобилӣ ва хизматрасонии логистикӣ»-ро ба моддаи 12 Конститутсияи ҶТ номувофиқ номид

Сентябрь 27, 2016 16:01

Душанбе, 27.09.2016. /АМИТ «Ховар»/. Дар Суди конститутсионии Ҷумҳурии Тоҷикистон таҳти раисии Маҳкам Маҳмудзода, раиси Суди конститутсионии ҶТ парванда аз рӯи дархости директори генералии ҶДММ «Наҷот»-и шаҳри Исфара Н. Исомадинова «Дар хусуси муайян намудани мувофиқати сархатҳои чорум, чордаҳум ва ҳабдаҳуми банди 2.4, банди 4.1, сархатҳои якум, дуюм ва ҳафтуми банди 4.4-и Оинномаи КВД «Нақлиёти автомобилӣ ва хизматрасонии логистикӣ», ки бо фармоиши Вазорати нақлиёти Ҷумҳурии Тоҷикистон соли 2013 тасдиқ карда шудааст, ба моддаи 12 Конститутсияи Ҷумҳурии Тоҷикистон» баррасӣ гардид.
Суди конститутсионӣ ин дархостро мавриди омӯзиш ва таҳлил қарор дода, зикр кард: «Дар низоми кафолатҳои давлатии эълондоштаи Конститутсия, кафолати фаъолияти озоди соҳибкорӣ мавқеи марказиро ишғол менамояд ва яке аз унсурҳои муҳими рушди мутаъдили соҳаҳои иқтисодию иҷтимоии кишвар ба шумор меравад.
Машғул шудан ба фаъолияти соҳибкорӣ ҳамчун унсури асосии принсипи конститутсионии озоди иқтисодӣ, ифодаи озод будани соҳибкорӣ буда, яке аз ҳуқуқҳои асосӣ ва муҳими иқтисодӣ, инчунин имконият ва василаи татбиқи ҳуқуқи иҷтимоии инсон ва шаҳрванд маҳсуб мешавад ва бо санадҳои байналмилалии эътирофнамудаи Тоҷикистон ва қонунгузории кишвар кафолат дода мешавад». Ин кафолат аз шаклҳои гуногуни моликият асос ёфтани иқтисодиёти Ҷумҳурии Тоҷикистон, аз ҷумла моликияти хусусӣ, инчунин иҷтимоӣ эълон шудани давлат маншаъ мегирад, ки бе татбиқи амалии он бунёди ҷомеаи воқеан иҷтимоӣ ва иқтисоди бозаргонии дар муносибатҳои иқтисодӣ рақобатпазир ғайриимкон мебошад.
Тавассути Оиннома ба КВД «Нақлиёти автомобилӣ ва хизматрасонии логистикӣ» вогузор намудани ваколатҳои идоракунӣ, инчунин татбиқи ин ваколатҳо боиси маҳдуд кардани фаъолияти озоди соҳибкорӣ, додани бартарӣ ба субъекти алоҳидаи хоҷагидорӣ ва ба миён овардани рақобати бевиҷдонона гардида, кафолати фаъолияти соҳибкории пешбининамудаи моддаи 12 Конститутсияи ҶТ-ро нисбат ба ҶДММ «Наҷот» поймол ва маҳдуд намудааст. Бинобар ин, Суди конститутсионии Ҷумҳурии Тоҷикистон сархатҳои чорум, чордаҳум ва ҳабдаҳуми банди 2.4, банди 4.1, сархатҳои якум, дуюм ва ҳафтуми банди 4.4-и Оинномаи КВД «Нақлиёти автомобилӣ ва хизматрасонии логистикӣ»-ро ба моддаи 12 Конститутсияи Ҷумҳурии Тоҷикистон номувофиқ арзёбӣ кард.

Сентябрь 27, 2016 16:01

Хабарҳои дигари ин бахш

Омодагӣ ба ҷаласаи Комиссияи байниҳукуматӣ оид ба ҳамкории тиҷоратию иқтисодӣ байни Тоҷикистон ва Озарбойҷон баррасӣ гардид
Имрӯз дар шаҳри Душанбе ҳаво то 38 дараҷа гарм мешавад
Дар Конибодом ба хонандагон либосҳои мактабӣ ва ашёи хониш тақдим гардид
Дар Душанбе дар мавзуи «Навсозии Чин» конференсия баргузор гардид
Истиқлоли давлатӣ омили калидии сиёсати муваффақи Тоҷикистон дар арсаи байналмилалӣ аст
МегаФон Тоҷикистон бурди миллион сомонӣ ва туҳфаҳои дигари олиҷанобро доир менамояд
Имрӯз дар ноҳияҳои кӯҳии Тоҷикистон ҳаво то 36 дараҷа гарм мешавад
Дар Бохтар ба кӯдакони ятим ва ниёзманд либосҳои мактабию лавозимоти хониш тақдим гардид
Дар палатаи поёнии Парлумони Тоҷикистон бо ҳайати Ҷумҳурии Мардумии Чин мулоқот доир шуд
Дар Тоҷикистон беш аз 1,9 миллион либоси мактабӣ истеҳсол карда шудааст
ОМОДАГӢ БА СОЛИ НАВИ ТАҲСИЛ. Дар Гулистон давраи мутобиқшавии хонандагони синфи якум идома дорад
Имрӯз дар водиҳои Тоҷикистон ҳаво то 39 дараҷа гарм мешавад