Дар Душанбе зодрӯзи Маҳатма Гандӣ таҷлил гашт

Душанбе, 04.10.2016. /АМИТ «Ховар»/. Бахшида ба таҷлили 147- умин солгарди зодрӯзи Маҳатма Гандӣ, ки 2 уми октябри соли 1869 дар Порбандар таваллуд шудааст, дар толори китобхонаи АИ ҶТ маҳфили илмии ихтисосӣ баргузор гардид.
Нишасти илмиро директори Китобхонаи марказии илмии ба номи Индира Гандии Академияи илмҳои Ҷумҳурии Тоҷикистон Шодимуҳаммад Сӯфизода ифтитоҳ намуд. Дар маҳфил Сафири Кабири кишвари Ҳиндустон дар Душанбе Сомнатҳ Гҳош, кормандони сафорат ва аъзои Ҷамъияти дӯстии Тоҷикистону Ҳиндустон ширкат намуданд.
Шодимуҳаммад Сӯфизода иброз дошт, ки дар таърихи сиёсии башарият нақши Маҳатма Гандӣ бағоят бузург буда, ӯро чун роҳбари маънавии Ҳидустон мешиносанд. Ӯ нахустин фарде буд, ки озодии Ҳиндро аз роҳе ба даст овард, ки барои бисёриҳо ҳатто тасаввури он мушкил ва ғайриимкон менамуд. Рафторе, ки Гандӣ дар пеш гирифт, дар қиёс бо он чӣ, ки акнун дар ҷаҳон мегузарад, ба муъҷиза шабоҳат дорад. Ӯ роҳи ҳаллеро баргузид, ки намуна буд- ҷанг бидуни ҷанг! Бесабаб нест, ки ҳиндустониён ӯро дар Ҳинд «Мҳатма», яъне Рӯҳи Бузург лақаб доданд.
Майрам Исоева, ҳунарманди тоҷик дар маҳфил таъкид кард, ки ҳоло тамоми дунё ба чунин шахсият, яъне Маҳатма Гандӣ ниёз дорад. Мо бояд фалсафаи зиндагӣ ва фаъолияти сиёсии ӯро биомӯзем.