«Дурахши меҳр»-маҳфили шеъру суруд, ки ба ёдбуди Махсум Олимӣ бахшида мешавад

Душанбе, 4.10.2016 /АМИТ «Ховар»/. 5 октябр дар Филармонияи давлатии Тоҷикистон ба номи А. Ҷӯраев маҳфили шеъру суруд таҳти унвони «Дурахши меҳр» баргузор мегардад.
Маҳфил ба гиромидошти 60-солагии шоири шодравон Махсум Олимӣ бахшида шуда, дар он ҳунарпешаи шинохтаи кишвар Хосияти Зарафшонӣ, шоирону рӯзноманигорон, мухлисону ҳаводорони осори шоир иштирок хоҳанд кард.
Махсум Олимӣ зодаи деҳаи Каздони ноҳияи Айнӣ буда, ба шеъргӯӣ соли 1973 оғоз кардааст. Нахустин шеъри ӯ бо номи «Модар» дар рӯзномаи ноҳиявии «Меҳнат»-и ноҳияи Айнӣ рӯи чоп омадааст. Шеърҳои ӯ ба забонҳои русӣ, украинӣ, озарӣ, ӯзбекӣ, чувашӣ, болқарӣ, лазгӣ ва ғайра тарҷума шудаанд.
Дар ин бора аз Вазорати фарҳанги Ҷумҳурии Тоҷикистон ба АМИТ «Ховар» хабар доданд.