Пагоҳ дар шаҳри Роғун барномаи фарҳангии «Бо забон ҷовид бошед» баргузор мегардад

Душанбе, 04.10.2016. /АМИТ «Ховар»/. Имрӯз дар китобхонаҳои шаҳри Роғун бахшида ба таҷлили Рӯзи забони давлатӣ вохӯрии аҳли адабу маориф бо хонандагону донишҷӯён ва сокинони ҷамоатҳои шаҳраку деҳот доир гардид. Дар вохӯриҳои мазкур хонандагони муассисаҳои таълимии шаҳр аз ашъори шоирон шеърҳо қироат намуданд. Аҳли адаб дар бораи татбиқи амалии Қонуни Ҷумҳурии Тоҷикистон «Дар бораи забони давлатии Ҷумҳурии Тоҷикистон», муқаррароти забон, риояи имлои забон дар раванди баргузории машғулиятҳо изҳори андеша намуданд.
Таъкид гардид, ки аҳли эҷоду хонандагони эҷодкор бояд ҳангоми навиштану эҷод кардан нисбат ба тозаю беолоиш нигоҳ доштани забони модарӣ бемасъулият набошанд ва ба он аҳамияти ҷиддӣ диҳанд. Инчунин дар муассисаҳои таълимии шаҳр бо иштироки устодону хонандагон дар мавзӯи «Забони модарӣ хишти нахустини пойдевори кохи миллат аст» конфронсҳои илмӣ- адабӣ баргузор мешаванд.
Дар назар аст, ки шоми 5 октябри соли равон дар Қасри фарҳанги шаҳр бо иштироки кормандони ташкилоту муассисаҳо, собиқадорону олимон ва хонандагон барномаи тантанавӣ бахшида ба Рӯзи забони давлатӣ таҳти унвони «Бо забон ҷовид бошед» доир гардад.
Тибқи иттилои маъулини бахши фарҳанги шаҳр, дар барнома олимону нависандагони шаҳр дар бораи аҳамияти забони давлатӣ ва тоза нигоҳ доштани забону бехато навиштан сухан мегӯянд.