Сиёсати давлатии ҷавонон аз самтҳои муҳими сиёсати Ҳукумати Ҷумҳурии Тоҷикистон мебошад

Душанбе, 28.10.2016 /АМИТ «Ховар»/. Имрӯз дар Донишгоҳи давлатии омӯзгории Тоҷикистон бо иштироки намояндагони ҷавонони кишварҳои узви Созмони ҳамкории Шанхай, аз ҷумла Федератсияи Русия, Ҷумҳурии Мардумии Чин, Қазоқистон, Ӯзбекистон ва Қирғизистон ҳамоиш таҳти унвони «Созмони ҳамкории Шанхай ва ҷавонон: Ташаббуси созандаи Пешвои миллат» доир гардид.
Дар ҳамоиш муовини якуми раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Мавсума Муинӣ иброз дошт, ки сиёсати давлатии ҷавонон яке аз самтҳои муҳими сиёсати Ҳукумати Ҷумҳурии Тоҷикистон маҳсуб шуда, доир ба такмил ёфтани он пайваста тадбирҳои зарурӣ амалӣ мегарданд.
«Боиси ифтихор аст, ки бо ибтикори Асосгузори сулҳу Ваҳдати миллӣ, Пешвои миллат муҳтарам Эмомалӣ Раҳмон 10 июни соли 2015 дар ҷаласаи сарони давлатҳои узви Созмони ҳамкории Шанхай дар шаҳри Уфаи Ҷумҳурии Бошқирдистони Федератсия Русия ҳангоми суханрониашон аз ҷавонони ҷаҳон пуштибонӣ намуда, пешниҳод намуданд, ки яке аз солҳо дар сатҳи байналмилалӣ ҳамчун «Соли ҷавонон» қабул гардад»,- гуфт Мавсума Муинӣ ва илова намуд, ки «дар шароити имрӯзаи ҷомеаи ҷаҳонӣ пешниҳоди мазкур саривақтӣ буда, аз ҳар ҷиҳат боиси дастгирист. Ин иқдом дар самти такмилёбии сиёсати байлалмилалии чавонон, мубодилаи ҷаҳонбинии онҳо, аз худ намудани таҷриба, татбиқи ғояҳои нав ва ҳамкории бисёрҷонибаи сиёсати ҷавонон нақши муассир дорад».
Ҷумҳурии Тоҷикистон дар байни давлатҳои собиқ Иттиҳоди Шӯравӣ яке аз аввалин давлатҳоест, ки санади меъёрии ҳуқуқии хешро дар самти сиёсати давлатии ҷавонон 13 марти соли 1992 қабул намуда, соли 1997 мақомоти ваколатдори давлатии соҳаи кор бо ҷавонон- Кумитаи кор бо ҷавононро таъсис дод.