Соҳибкорони олмонӣ ба Форуми сармоягузории Душанбе-2016 меоянд

Душанбе, 13.10.2016 /АМИТ «Ховар»/. Пагоҳ, 14-уми октябри соли 2016 дар шаҳри Душанбе Форуми байналмилалии сармоягузории «Душанбе-2016» баргузор мегардад. Барои иштирок дар кори он ҷиҳати ҷалби доираҳои иқтисодӣ ва сармоягузории кишвари Олмон Сафорати Тоҷикистон дар якҷоягӣ бо намояндагии тиҷоратии Тоҷикистон дар Олмон вохӯриҳои корӣ анҷом дода, оид ба фазои сармоягузорӣ, қонунгузориҳои амалкунанда, инчунин имконоту захираҳои иқтисодии кишварамон маълумоти дахлдор паҳн намуд.
Дар қатори намояндагони Бонки рушди Олмон, Агентии ҳамкории байналмилалӣ, инчунин як зумра намояндагони ширкатҳо ва соҳибкорони Олмон, аз ҷумла Мактаби иқтисодӣ-молиявии Франкфурт, ширкати «REF Europe GmbH», «BRS Higen Solutions», «HIT Hold Managing Group», «Akebono Bieki Co.Ltd» ва ғайра тасмим доранд, ки дар кори Форум фаъолона ширкат варзанд.
Хотиррасон мекунем, ки соли равон ба хотири ҷалби сармояи Олмон ба иқтисоди Тоҷикистон дар шаҳрҳои Душанбе, Берлин ва Ҳамбург якчанд ҳамоишҳои сармоягузорӣ доир гардиданд. Сафорати Тоҷикистон дар Олмон то охири сол якчанд чорабиниҳои таблиғотӣ барои ҷалби саҳмгузории соҳибкорони кишвари иқомат ба иқтисоди миллиро дар назар дорад.
Дар ин бора аз Сафорати Тоҷикистон дар Олмон хабар доданд.