Дар ДДТТ семинари «Истифодаи самараноки маводи доруворӣ» доир шуд

Душанбе, 17 .11.16. /АМИТ «Ховар»/. «Истифодаи самараноки маводи доруворӣ. Антибиотикрезистентнокӣ ва роҳҳои бартараф кардани он»- таҳти чунин унвон дар Маркази иттилоотӣ оид ба маводи доруворӣ (МИМД)- и Донишгоҳи давлатии тиббии Тоҷикистон ба номи Абӯалӣ ибни Сино семинар баргузор шуд.
Дар ин бора аз маркази матбуоти ДДТТ хабар дода, илова карданд, ки дар семинар ба иштирокчиён оид ба «Истифодаи самараноки маводи доуворӣ», «Маводи дорувории аслӣ, генерикӣ ва номгӯи ғайрипатентии байналмилалии онҳо», «Хосиятҳои клиникӣ-фармакологии гурӯҳҳои асосии маводи зиддибактериявӣ», «Мушкилоти антибиотикрезистентнокӣ ва роҳҳои бартараф кардани он» ва «Ҳамтаъсирии маводи зиддибактериявӣ бо дигар маводи доруворӣ» муфассал иттилоот дода шуд.
Ба иттилои манбаъ, «иштирокчиён дар доираи семинар санҷида шуданд ва маълум гашт, ки бештари иштирокчиён оид ба мавзӯъҳои баррасишаванда дониши кофӣ надоранд».
Тибқи нақшаи пешбинишуда чунин семинарҳо дар байни тамоми ординаторони клиникӣ гузаронида мешаванд.