Конститутсия-ҳимоякунандаи ҳадафҳо ва манфиатҳои миллист

Душанбе, 05.11.2016. /АМИТ «Ховар»/. 4 ноябр бахшида ба 22-юмин соргарди рӯзи қабули Конститутсияи Ҷумҳурии Тоҷикистон дар Донишкадаи молия ва иқтисоди Тоҷикистон ҷаласаи тантанавӣ доир шуд.
Тавре котиби матбуоти донишкада Машҳура Абдуллоева хабар дод, ректори донишкада Ашурбой Солеҳзода зимни табрики ҳозирин бо ин санаи муҳим зикр намуд, ки «ин санади асосӣ ҳамчун муайянкунандаи роҳу равиши кишвари соҳибистиқлоли тоҷикон хизмат мекунад. Конститутсия ба ҷумлаи беҳтарин санадҳо дохил шуда, мабдаъҳои ҷавҳариаш нахустасоси таъминкунандаи ҳаёти осудаи мардуми кишвар ва рушди муттасили соҳаҳои гуногуни ҷомеа ба шумор меравад.
Итминони комил дорем, ки Конститутсияи Ҷумҳурии Тоҷикистон бо тағйиру иловаҳое, ки дар соли 2016 ворид карда шуданд, барои татбиқи пурраи «Стратегияи миллии рушди Ҷумҳурии Тоҷикистон то давраи соли 2030» хизмат хоҳад намуд».
Дар ҷамъомад намояндаи Суди конститутсионии Ҷумҳурии Тоҷикистон Хисрав Турсунов дар бораи тағйиру иловаҳои воридшуда ба Конститутсия гуфт, ки «тағйиру иловаҳо дар замони худ зарурӣ буданд ва зиндагӣ собит сохт, ки ин санади тақдирсоз барои таҳкими пояҳои истиқлолият ва пешрафти Ҷумҳурии Тоҷикистон, ҳамчунин таҳкими ваҳдати миллӣ мусоидат намуд».
Инчунин дар мавзӯъҳои «Конститутсия бахтномаи миллат», «Нақши Конститутсия дар ҷараёни фаъолияти қонунэҷодкунӣ» аз ҷониби устодони донишкада маърӯзаҳо шунида шуданд. Зикр гардид, ки Конститутсия ҳуҷҷати расмии дорои аҳамияти ҷамъиятӣ ва давлатӣ буда, заминаи ҳуқуқии бунёди давлати тозабунёд ва соҳибистиқлоли тоҷикон, шакли ифодаи ҳуқуқии ормонҳои давлатдории миллӣ, ҳимояи ҳадафҳо ва манфиатҳои миллӣ мебошад.