Кормандони Кумитаи ҳолатҳои фавқулода ва мудофиаи гражданӣ 3 нафарро наҷот доданд

Душанбе, 25.11.16. /АМИТ «Ховар»/. Се нафар аз ҷониби кормандони Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон наҷот дода шуданд. Дар ин бора аз хадамоти матбуоти кумита ба АМИТ «Ховар» хабар доданд.
Бино ба иттилои кумита, мошини тамғаи «Opel Vectra» ба дарё афтида, дар натиҷаи амалиёти бобарори наҷотдиҳӣ кормандони кумита тавонистанд мусофирони мошинро наҷот диҳанд.
Хабар дода мешавад, ки сокини 27- солаи ноҳияи Варзоб аз уҳдаи идораи мошин набаромада, мошин ба дарё чаппа шудааст.
Кормандони дастаи ҷустуҷӯиву наҷотдиҳии ситоди шаҳри Душанбе тавонистанд амалиётро фаврӣ ва ботартиб гузаронида, фавран ба ҷои ҳодиса омада, ронанда ва ду мусофирро наҷот диҳанд. Ба онҳо инчунин муяссар гашт, ки мошинро аз дарё берун бароранд.
Хотиррасон мекунем, ки кормандони КҲФ дар 9 моҳи соли равон 140 нафарро наҷот додаанд.