Муъминобод: Қисмати зиёди деҳаҳо бо оби ошомиданӣ таъминанд

Муъминобод, 10.11.2016 /АМИТ «Ховар»/. Дар толори Мақомоти иҷроияи ҳокимияти давлатии ноҳияи Муъминобод ҷаласаи шабакаи ҳамкорон оид ба масъалаҳои таъминоти об ва беҳдошт баргузор гардид. Дар ҷаласа намояндагони мақомоти иҷроияи ҳокимияти давлатӣ, ассотсиатсияҳои истифодабарандагони об, ташкилоти ҷамъиятӣ, намояндагон аз ноҳияи Рӯдакӣ ва раисони ҷамоатҳои деҳот иштирок намуданд.
Тавре Раҷабалӣ Баҳронов, директори ташкилоти ҷамъиятии Муъминобод иттилоъ дод, кормандони Маркази назорати давлатии санитариву эпидемиологии ноҳия солҳои охир барои таъмини аҳолии ноҳия бо оби тозаи хушсифат як зумра корҳоро ба анҷом расониданд. Ҳоло аҳолии ноҳия аз 76 шабакаи мутамаркази обтаъминкунӣ ба оби нӯшокӣ дастрасӣ доранд. Аз ин 76 шабакаи мутамарказ 16 адади он аз тариқи чоҳҳои амудӣ ва 60 шабакаи дигар аз чашмаҳо об мегиранд.
Барои устувории лоиҳаҳо ва нигоҳдории иншооти об онҳоро ба мақомоти худфаъолиятӣ- ҷамъиятӣ вогузор намудаанд. Дар қисмати зиёди шабакаҳо барои ҳар як истифодабаранда ҳисобкунакҳо васл карда шудаанд, ки ба истифодаи самараноки об ва пардохти саривақтии маблағи истифодаи об мусоидат мекунанд.
Дар анҷоми ҳамоиш иштирокдорон аз мавҷудияти ноқисӣ дар баъзе шабакаҳои обрасон ва зудтар бартараф кардани камбудиҳо ҳангоми лоиҳакашӣ ва сохтмони иншооти нав сухан ронданд.