Таҷлили Рӯзи Конститутсия дар Муассисаи давлатии Коллеҷи ҷумҳуриявии хореографии ба номи Малика Собирова

Душанбе, 05.11.2016 /АМИТ «Ховар»/. Дар ташкилоти ибтидоии ҳизбии «Малика»-и Муассисаи давлатии Коллеҷи ҷумҳуриявии хореографии ба номи Малика Собирова ба муносибати 22 — солагии Конститутсияи Ҷумҳурии Тоҷикистон маҷлиси умумии ҳизбӣ барпо гардид. Дар ин бора аз шуъбаи таблиғот ва иттилооти Кумитаи иҷроияи ҲХДТ дар ноҳия Шоҳмансур хабар доданд.
Кенҷа Иброҳимов, директори муассисаи давлатии Коллеҷи ҷумҳуриявии хореографии ба номи Малика Собирова иброз дошт, ки «кормандону устодони ин боргоҳи маърифат бо истифода аз иқтидори эҷодию амалӣ баҳри иҷрои босуботи ҳама нақшаву ниятҳо ва боло бурдани сатҳи маънавиёти ҷомеа тамоми донишу малака, ақлу идрок, кӯшишу ғайрат ва ҳунару истеъдоди хешро баҳри ташаккули ҷаҳони маънавии шаҳрвандон ва афзудани обрӯи Тоҷикистони соҳибистиқлол дар арсаи ҷаҳонӣ равона менамоянд».
Ҳамзамон Ҷӯрабек Муродов, мудири шуъбаи таблиғот ва иттилооти Кумитаи иҷроияи ҲХДТ дар ноҳия Шоҳмансур зикр кард, ки «Ҳизби Халқии Демократии Тоҷикистон татбиқи сиёсати давлат дар самти баланд бардоштани маърифати ҳуқуқии шаҳрвандон ва таъмини ҳуқуқу озодиҳои инсон, тарғиби Конститутсия ва қонунҳои Ҷумҳурии Тоҷикистонро аз вазифаҳои аввалиндараҷаи худ мешуморад ва кӯшишу заҳматҳои худро пайваста ба ин самт равона менамояд».