Дар Театри давлатии академии опера ва балет маҳфили эҷодии Арбоби ҳунари Тоҷикистон Қудратулло Яҳёзода доир мешавад

Душанбе, 06.12.2016. /АМИТ «Ховар»/. Маҳфили эҷодии Арбоби ҳунари Тоҷикистон, барандаи Ҷоизаи давлатии ба номи Абўабдуллоҳи Рўдакӣ, композитори маъруф Қудратулло Яҳёзода 16 декабри соли равон соати 17:00 дар Театри давлатии академии опера ва балети ба номи Садриддин Айнӣ доир мешавад. Тавре аз Вазорати фарҳанги Ҷумҳурии Тоҷикистон ба мо иттилоъ доданд, маҳфил ба 70- солагии оҳангсози маъруф Қудратулло Яҳёзода бахшида мешавад.
Бояд гуфт, ки асарҳои композитор Қудратулло Яҳёзода ҳам аз ҷиҳати созу наво, ҳам матну мазмун, ҳам навозиш ба гўши шунаванда ошно ва самимиву заминианд. Васфи Ватан ва гўшаҳои дилкушои он, меҳри оламгири модар, ваҳдату саодати халқ, садоқати фарзандиву шаҳрвандӣ ва меҳру муҳаббати поки инсонӣ мавзўъҳои эҷодиёти оҳангсозанд.
Ҳамчунин эҷодиёти оҳангсоз Қудратулло Яҳёзода танҳо бо сурудҳо маҳдуд намешавад. Консерти сеқисма барои скрипка ва оркестр, суитаҳои чорқисмаи симфонии «Тоҷикистони ман» ва «Идона», достони симфонии «Ёддоштҳо» (ба хотираи устод Айнӣ), силсилаи оҳангҳои вокалию хореографӣ, сурудҳои фаровон барои бачаҳо (машҳуртаринҳояш «Офтоби ман», «Кабўтарак», «Обаки ширин», «Гулпаракҳо омаданд», «Машъали ҷовидон», «Душанбеи гулобод», ки дар ҷашну консертҳо пайваста садо медиҳанд), оҳангҳо барои созҳои мухталиф, мусиқӣ барои намоишномаи зиёди театр ва ду филми ҳунарӣ аз гуногунпаҳлўии фаъолияти эҷодии ў шаҳодат медиҳанд.