«Истиқлол»-и Душанбе ба тамринҳои мавсими нав оғоз кард

ДУШАНБЕ, 19.12.2016 /АМИТ «Ховар»/. Чемпиони панҷкаратаи Тоҷикистон «Истиқлол»-и Душанбе истироҳати худро баъди мавсими соли 2016 ба анҷом расонида, ба тамринҳои худ оғоз кард. Дар ин бора сухангӯи КФ «Истиқлол» Рустам Ҳакимов ба хабарнигори АМИТ «Ховар» хабар дод.
«Истиқлол» ба машқҳои мавсими соли 2017 таҳти роҳбарии мураббии нави худ Мӯҳсин Муҳаммадиев дар Варзишгоҳи марказии ҷумҳуриявӣ аз рӯзи шанбе шурӯъ кард. Дар ҳайати даста то ҳол тағйирот ба вуҷуд наомадааст. Никола Стошич ва Девид Маутор, ки шаҳрвандии Тоҷикистонро қабул кардаанд ва шиносномаи тоҷикӣ доранд, дар ҳайати даста ҳузур доранд. Петро Ковалчук, аз легионерҳои «Истиқлол», новобаста ба он ки шартномааш бо даста ба анҷом расидааст, ба машқҳо ҷалб карда шудааст. Масъалаи шартномаи навбатии ӯ бо «Истиқлол» рӯзҳои наздик мавриди баррасӣ қарор хоҳад гирифт», -хабар дод манбаъ.
«Истиқлол» дар як рӯз ду маротиба машқ мекунад ва тайёрии асосиаш ба мавсими соли 2017 ва иштирок дар бозиҳои Ҷоми Конфедератсияи футболи Осиё дар гурӯҳи «D»-и минтақаи марказӣ ба ҳисоб меравад.
Чемпион аввалин бозии худро дар доираи бозиҳои гурӯҳии ҷоми КФО 14 март дар Варзишгоҳи марказии ҷумҳуриявии шаҳри Душанбе бо ғолиби бозиҳои плей-офф мегузаронад.