Кишоварзони Хатлон технологияи бунёд, башаклдарорӣ ва барқароркунии боғу токзорро меомӯзанд

ҚӮРҒОНТЕППА, 26.12.2016 /АМИТ «Ховар»/. 25 декабр дар ноҳияи Бохтари вилояти Хатлон дар мавзӯи «Технологияи бунёд, башаклдарорӣ, барқароркунии боғу токзор, рушди соҳаи ситруспарварӣ ва кишти картошкаи барвақтӣ» машварат баргузор гардид. Тавре аз мақомоти иҷроияи ҳокимияти давлатии вилояти Хатлон иттилоъ доданд, иштирокдорони машварат бо технологияи кишти картошка, яхобмонӣ ва обшӯии заминҳо дар ҶДММ «Мумин-Коттон» ва тарзи парвариши сабзавоти барвақтӣ дар гармхонаҳои хоҷагии деҳконии «Бобои Эргаш» шинос гаштанд.
Ҳамзамон иштирокчиёни машварат бо истифодаи усулҳои шинонидани ниҳолҳо, кишти картошка ва гармхонаҳои лимӯпарварии кооперативи тиҷоратии «Сомон» шинос шуданд.
Машварати мазкур барои хуб ба роҳ мондани боғу токпарварӣ ва даст овардани ҳосили хуби картошкаву лимӯ мусоидат мекунад.