ҶСК «Фурудгоҳи байналмилалии Душанбе»: ҳадаф-хизматрасонии босифат

ДУШАНБЕ, 12.12.2016 /АМИТ «Ховар»/. Хадамоти хизматрасонии рӯизаминии ҶСК «Фурудгоҳи байналмилалии Душанбе» ҷиҳати сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2016-2017 як қатор корҳоро ба анҷом расонид. Дар ин бора аз Хадамоти мазкур хабар доданд.
«Дар айни замон 215 адад техникае, ки ба ин Хадамот вобаста шудаанд, дар ҳолати хуби корӣ ва омодабош қарор доранд. Дар рӯзҳои пурбарфу сард мутахассисони Хадамоти номбурда ба таври шабонарӯзӣ кор карда, барои бе монеа пешвоз гирифтан ва гусели ҳавопаймоҳо кӯшиш ба харҷ медиҳанд»,-зикр кард манбаъ.
«Вазифаҳои асосии Хадамот аз таъминоти фаъолияти корхона бо нақлиёти автомобилӣ, ташкили кори нақлиёти махсус, татбиқи истифодаи самаранок, оқилона ва эҳтиёткоронаи механизмҳо ва мошинҳои махсус, маводи баҳрабардорию таъмиркунӣ ва таҷҳизот тибқи меъёрҳо ва қоидаҳои муқарраршуда, ташкил ва амалисозии хизматрасонии босифат ва саривақтии ҳавопаймоҳо бо механизмҳо ва мошинҳои махсус, ҳамлу нақли мусофирон, почта, борҳо, истифода ва таъмири саривақтии кондитсионерҳо, ташкили истифода ва таъмири дурусти техникии мошинҳо ва механизмҳо иборат мебошанд»,-хабар доданд аз Хадамоти хизматрасонии рӯизаминии ҶСК «Фурудгоҳи байналмилалии Душанбе».