Дар Душанбе калонтарин сардхона барои нигоҳдории маҳсулот ба фаъолият шурӯъ мекунад

ДУШАНБЕ, 19.01.17. /АМИТ «Ховар»/. Рӯзҳои наздик дар Душанбе калонтарин сардхона ба фаъолият шурӯъ менамояд. Дар ин бора зимни нишасти хабарӣ имрӯз, 19 январ раиси Иттифоқи «Тоҷикматлубот» Ҳусайн Идиев иттилоъ дод.
Ӯ афзуд, ки ин иқдом мутобиқи иҷрои Қарори Ҳукумати Ҷумҳурии Тоҷикистон дар бораи «Барномаи ташкил ва барқарорсозии яхдону сардхонаҳо барои нигоҳдории маҳсулоти кишоварзӣ дар Ҷумҳурии Тоҷикистон барои солҳои 2015-2019» буда, айни ҳол сохтмони сардхона пурра ба итмом расидааст. Он моҳи феврал ба истифода дода хоҳад шуд.
Сардхонаи мазкур дар Тоҷикистон калонтарин ба ҳисоб рафта, барои нигоҳдории 1500 тонна маҳсулот пешбинӣ шудааст.
Имрӯз дар ҷумҳурӣ чунин сардхонаҳо дар ноҳияи Бобоҷон Ғафуров ва Исфара низ фаъолият менамоянд, ки дар онҳо ҳамасола сабзавоту мева ва маҳсулоти гӯштӣ нигоҳ дошта мешаванд.
Ба иттилои раиси Иттифоқи «Тоҷикматлубот», ҳамчунин барои таъмини аҳолӣ бо маҳсулоти тоза ва пешгирӣ намудани болоравии нарх дар бозори истеъмолии шаҳри Душанбе 12 мошини боркаш ба маблағи беш аз 918 ҳазор сомонӣ харидорӣ карда шуда, имрўз дар минтақаҳои гуногуни шаҳри Душанбе фурўши маҳсулоти кишоварзӣ ба воситаи мошинҳои мазкур ба роҳ монда шудааст.
Ин бисёр иқдоми худ буда, аз тарафи истеъмолкунандагон хуш пазируфта шуд, зеро барои сокинони шаҳр имконият пайдо гардид, ки бо нархи дастрас ва аз макони истиқоматашон меваю сабзавот харидорӣ намоянд.