Фароғат Азизӣ: «Шумораи довталабони Консерваторияи миллӣ кам буда, озмуни дохилшавӣ пуравҷ намегузарад»

ДУШАНБЕ, 23.01.2017 /АМИТ Ховар/. Имрӯз ректори Консерваторяи миллии Тоҷикистон Фароғат Азизӣ зимни нишасти матбуотӣ ба хабарнигорон иттилоъ дод, ки қабули донишҷӯён ба Консерватория танҳо тавассути мактабҳои мусиқӣ амалӣ мешавад.
«Консерватория маҷбур аст хонандагонеро, ки дар мактабҳои ибтидоии мусиқӣ ва санъат таҳсил кардаанд, ба Консерватория қабул кунад, зеро онҳо савод ва фаҳмиши мусиқӣ доранд. Муттаассифона, шумораи довталабони Консерваторияи миллӣ кам буда, озмуни дохилшавӣ байни онҳо пуравҷ намегузарад. Имрӯз кабинети методие, ки бояд дар соҳаи санъат ва фарҳанг бошад, дар Вазорати фарҳанг вуҷуд надорад. Мо ба ин сохтор хеле эхтиёҷманд ҳастем, зеро таносуб байни мактабҳои таълимӣ ва Консерваторияи миллӣ аз байн рафта истодааст»,- гуфт Фароғат Азизӣ.
Ба гуфтаи номбурда, бисёр мавзӯъҳоеро, ки хонандагон бояд дар мактабҳои мусиқӣ ва коллеҷҳои санъат хонанд, онро наомӯхта, ба Консерватория меоянд. Аз ин рӯ, ҷараёни таҳсил барои омӯзгор ва донишҷӯ мушкил мегардад.
Дар соли таҳсили 2016 барои қабули довталабон 131 ҷой ҷудо гардид. Консерватория тавонист 82 %-и онро иҷро кунад.