Мурод Ҷумъазода: «Саридораи геология ба буҷет беш аз 7 миллион сомонӣ андоз супорид»

ДУШАНБЕ, 10.01.2017/АМИТ «Ховар»/. «Саридораи геологияи назди Ҳукумати Ҷумҳурии Тоҷикистон дар соли сипаригардида ба буҷети кишвар беш аз 7 миллион сомонӣ андоз супоридааст, ки ин 62 фоизи маблағҳои аз буҷаи давлатӣ барои иҷрои корҳои иктишофӣ ҷудошударо ташкил медиҳад»,-гуфт имрӯз зимни нишасти матбуотӣ ба хабарнигорон Мурод Ҷумъазода, сардори Саридораи геологияи назди Ҳукумати Ҷумҳурии Тоҷикистон. Мавсуф афзуд, ки мутахассисону кормандони Саридораи геологияи кишвар дар соли 2016 фаъолияти худро дар партави дастур ва ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон ба роҳ монда, аз ҳисоби буҷети давлатӣ аз рӯи 37 лоиҳа ба маблағи 13 миллион сомонӣ, корҳои шартномавиро аз рӯи 144 лоиҳа дар ҳаҷми беш аз 12 миллион сомонӣ ва корҳои пудратиро ба маблағи зиёда аз 440 ҳазор сомонӣ иҷро намудаанд.
Мурод Ҷумъазода зимни натиҷагирӣ аз фаъолияти Саридораи геологияи назди Хукумати ҷумҳурӣ дар зарфи соли 2016 зикр кард, ки дар соли сипаришуда аз ҷониби корхонаҳои воҳидии Саридора наздик ба 8 ҳазор метр чоҳҳо парма карда шудаанд, ки аз ин беш аз 2 ҳазор метр бо усули роторӣ, наздик ба 4 ҳазор метр бо усули колонковӣ ва боқимонда бо усулҳои зарбазанӣ-танобӣ ва нақбканӣ анҷом дода шуданд. Ҳамзамон дар соли гузашта барои иҷрои корҳои иктишофи геологӣ ба маблағи беш аз 11 миллион сомонӣ аз буҷа маблағ ҷудо гардид.