«Шоҳин Асмоӣ» ба Душанбе омад

ДУШАНБЕ, 26.01.2017/АМИТ «Ховар»/. «Шоҳин Асмоӣ», чемпиони Афғонистон оид ба футбол барои баргузор кардани вохӯрии аввали плей-оффи Ҷоми Конфедератсияии футболи Осиё бо дастаи «Ҳосилот»-и Фархор дирӯз ба Душанбе омад. Сармураббии даста Боир Эгамбердиеви тоҷикистонӣ 18 бозингарро бо худ оаврдааст. Сабаби барвақт ба Душанбе омадани даста шинос шудану одат кардан ва тайёрӣ дидан ба бозии нахустини дастаҳо маънидод мешавад.
Чемпионҳои секаратаи Афғонистон дар меҳмонхонаи «Пойтахт» ҷойгир шуда, машқҳои аввали худро имрӯз баргузор менамоянд.
Чемпиони Афғонистон то ба Душанбе омадан дар ду бозии санҷишӣ тавонистааст ҳарифони худро шикаст дода, бозии хуб нишон диҳад.
Бозии рафти дастаҳои «Шоҳин Асмоӣ» бо «Ҳосилот»-и Фархор 31 январ, соати 15:30 дар Варзишгоҳи марказӣ гузаронида мешавад. Бозии ҷавобии дастаҳо тибқи тақвим 7 феврал, соати 17:00 дар ҳамин варзишгоҳ доир мегардад.
Мухлисон метавонанд барои тамошо билетҳоро аз хазинаи Варзишгоҳ бо нархи 10 сомонӣ харидорӣ кунанд.