Баланд бардоштани сатҳи омодагии муҳоҷирон пеш аз сафар

ДУШАНБЕ, 07.02.2017. /АМИТ «Ховар»/. Моҳи январи соли равон бо мақсади баланд бардоштани сатҳи омодагии муҳоҷирон пеш аз сафар дар «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе 8 вохўрӣ бо муҳоҷирони меҳнатӣ гузаронида шуд.
Бино ба маълумоти Хадамоти муҳоҷирати Вазорати меҳнат, муҳоҷират ва шуғли аҳолӣ, дар вохӯриҳо масъалаҳои тарзи фаъолияти меҳнатӣ, дуруст пур кардани корти муҳоҷират, тартиби расман гирифтани иҷозатнома (патент), муҳлати иҷозатнома, тарзи дароз намудани муҳлати иҷозатнома, арзиши он, гузаштани муоинаи тиббӣ, гирифтани полиси суғуртавӣ, сертификат оид ба донистани забони русӣ, таърих ва асосҳои қонунгузории Федератсияи Россия, тартиби дар қайди ҷойи истиқомат гузоштани шаҳрвандони хориҷа, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар фаҳмонида шуданд.
Дар айни замон Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе бо якчанд муассисаҳои таълимии Вазорати меҳнат, муҳоҷират ва шуғли аҳолии Ҷумҳурии Тоҷикистон барои касб омӯхтан ба муҳоҷирони меҳнатӣ, омӯзиши забони русӣ, фарҳанг, таърих ва қонунгузории давлатҳои қабулкунанда шартномаҳои ҳамкорӣ бастааст. Аз ҷумла, бо КВД «Маркази таълимии омӯзиши модулии шаҳри Душанбе», Филиали КВД «Маркази таълимӣ», Филиали КВД «Маркази касбомӯзӣ», МД «Маркази калонсолони Тоҷикистон» ва Раёсати Агентии меҳнат ва шуғли аҳолӣ дар шаҳри Душанбе чунин шартномаҳо баста шуданд.
Бояд гуфт, ки бо мусоидати МД «Марказҳои машваратӣ ва омодагии пеш аз сафари муҳоҷирони меҳнатӣ» ба марказҳои таълимии вазорат барои омӯхтани касб ва забони русӣ чанд нафар шаҳрвандони мамлакат равона карда шуданд.