Дар ноҳияи Спитамен дастгоҳҳои обкашӣ таъмир гардида, иҷрои нақша 64 фоиз таъмин шуд

ДУШАНБЕ, 07.02.2017. /АМИТ «Ховар»/. Идораи давлатии беҳдошти замин ва обёрии ноҳияи Спитамен бо мақсади беҳтар намудани ҳолати мелиоративии заминҳо ва рӯёнидани ҳосили дилхоҳ дар мавсими имсола то имрӯз корҳои муайянро ба сомон расонидааст.
Тавре аз Идораи давлатии беҳдошти замин ва обёрии ноҳия ба АМИТ «Ховар» иттилоъ доданд, соли равон канали Учтеппа ба масоҳати 6 километр тоза карда шуда, айни ҳол корҳо дар ин самт идома доранд.
Ҳамчунин ба масоҳати 39 ҳазор м3 каналу заҳбурҳо тоза гардида, дар канали Куркат ба дарозии 500 метр лӯлаҳои обгузари қутрашон 1020 мм канда ва 268 метр қубурҳои нав оварда шуда, рӯзҳои наздик насб мегарданд.
Зикр кардан ба маврид аст, ки айни ҳол дар ноҳия 13 адад пойгоҳи обкашӣ вуҷуд дошта, дар он 28 адад дастгоҳи обкашӣ ва 13 чоҳи амудӣ мавҷуд мебошанд. То имрӯз 18 адад дастгоҳи обкашӣ таъмир гардида, иҷрои нақша 64 фоиз таъмин гардидааст.