«Ҳосилот»-и Фархор ба Қирғизистон меравад

ДУШАНБЕ, 18.02.2017/АМИТ «Ховар»/. Дастаи «Ҳосилот»-и Фархор барои гузаронидани бозии рафти плей-оффи Ҷоми Конфедератсияи футболи Осиё (КФО) бо дастаи «Дордой»-и Бишкек ба Қирғизистон сафар мекунад. Ин вохӯрӣ 21 феврал, соати 13 ба вақти Душанбе оғоз хоҳад ёфт.
«Ҳосилот» дар бозиҳои интихобӣ, ки моҳи январ оғоз шуданд, бар «Шоҳин Асмоӣ»-и Афғонистон (1:0, 0:0) ва «Дордой» бар «Балкан»-и Туркманистон (1:1, 2:1) ғолиб омаданд.
Вохӯрии байни ин дастаҳоро доварон аз кишвари Чин бо роҳбарии Ванг Ди ҳакамӣ мекунанд. Ба ӯ Сян Ши ва Чжан Чен ҳамчун доварони канорӣ кумак хоҳанд расонд. Довари эҳтиётӣ аз Покистон-Муҳаммад Аҳмад Рауф таъйин шудааст.
Бозии ҷавобии ин дастаҳо 28 феврал дар Варзишгоҳи марказии шаҳри Душанбе мегузарад. Аз рӯи натиҷаи ду вохӯрӣ дастаи ғолиб ба гурӯҳи «Д»-и Осиёи Марказӣ, ки дар он дастаҳои «Истиқлол»-и Душанбе, Алтин Асир»-и Туркманистон ва «Алай»-и Қирғизистон қарор доранд, ҳамроҳ мешавад.