«Салом модар, ман туро дӯст медорам!»-ҳамоиши тарбиявӣ дар Ашт

ДУШАНБЕ, 27.02.2017. /АМИТ «Ховар»/. Дар назди Муассисаи давлатии Театри мусиқӣ-драммавии ба номи Маҳмудҷон Воҳидови ноҳияи Ашт бахшида ба Соли ҷавонон эълон гардидани соли 2017 ҳамоиши тарбиявӣ таҳти унвони «Салом модар, ман туро дӯст медорам!» доир гардид.
Тавре аз Мақомоти иҷроияи ҳокимияи давлатии ноҳияи Ашт хабар доданд, дар ҳамоиш зиёда аз 150 нафар ҷавонон иштирок намуданд. Дар ҷараёни ҳамоиш ҷавонон ба модарони худ занг зада, бо меҳр ва муҳаббати зиёд «Ало, салом модар, ман туро дӯст медорам!» гуфтанд.
«Ҳамоиши «Салом модар, ман туро дӯст медорам!» меҳри фарзандро нисбат ба модар зиёд мегардонад. Вақте фарзанд ба модар занг зада мегӯяд, ки туро дӯст медорам, дили модар аз ин сухани фарзанд бисёр шод мешавад»,- баён дошт Ҷамшед Насриддинов, мудири бахши ҷавонон, варзиш ва сайёҳии ноҳия.
Ба иттилои манбаъ, баргузории ҳамоиши «Салом модар, ман туро дӯст медорам!» дар ҷамоатҳои ноҳия низ дар назар дошта шудааст.