Шаҳрванди Афғонистон ҳангоми убури ғайриқонунии сарҳади давлатӣ дастгир шуд

ДУШАНБЕ, 27.02.2017. /АМИТ «Ховар»/. Дар ҳудуди ноҳияи Ишкошим шаҳрванди Ҷумҳурии Исломии Афғонистон Увайдулло валади Абдулрауф, 32 сола, зодаи вилояти Фарохи вулусволии Пуштирӯд, истиқоматкунандаи вилояти Нимрӯз, шаҳри Заранҷ ҳангоми убури ғайриқонунии сарҳади давлатии Ҷумҳурии Тоҷикистон аз тарафи кормандони милитсияи Шубаи Вазорати корҳои дохилии Ҷумҳурии Тоҷикистон дар ноҳияи Ишкошим дастгир гардид. Дар ин бора аз Раёсати Вазорати корҳои дохилӣ дар Вилояти Мухтори Кӯҳистони Бадахшон хабар доданд.
Ба гуфтаи манбаъ, айни ҳол нисбат ба Увайдулло валади Абдулрауф аз ҷониби кормандони Шуъбаи корҳои дохилӣ дар ноҳияи Ишкошим бо аломати моддаи 335 қисми 1 Кодекси ҷиноятии Ҷумҳурии Тоҷикистон, яъне ғайриқонунӣ бидуни ҳуҷҷати муайяншуда ва иҷозати зарурӣ гузаштан аз сарҳади давлатии Ҷумҳурии Тоҷикистон парвандаи ҷиноятӣ оғоз шуда, тафтишоти пешакӣ дар ин самт идома ёфта, номбурда дар ҳабси пешакӣ қарор дорад.