ВКД: Баррасии масоили ҳамкорӣ дар мулоқот бо Сафири Ҷумҳурии Исломии Афғонистон

ДУШАНБЕ, 06.02.2017. /АМИТ «Ховар»/. 4 феврал мулоқоти Вазири корҳои дохилии Ҷумҳурии Тоҷикистон Рамазон Раҳимзода бо Сафири Фавқулода ва Мухтори Ҷумҳурии Исломии Афғонистон дар Ҷумҳурии Тоҷикистон Муҳаммадгул Залмай Юнусӣ доир гардид.
Дар вохӯрӣ аз ҷониби Ҷумҳурии Исломии Афғонистон муовини атташеи ҳарбии Сафорати мазкур Заманудин Заман, консули Сафорат Аҳмад Муслим Ҷоҳид ва котиби сеюми ин Сафорат Фаридун Секандарӣ ва аз ҷониби Ҷумҳурии Тоҷикистон иҷрокунандаи вазифаи роҳбари дастгоҳи Вазири корҳои дохилӣ Ҷамшед Машрабзода, сардори Раёсати мубориза бар зидди гардиши ғайриқонунии маводи мухаддири Вазорати корҳои дохилӣ Мустафо Рустамзода, сардори Раёсати мубориза бар зидди ҷиноятҳои муташаккили ВКД Сафиало Азизулозода, сардори Раёсати ҳамкории байналмилалии ВКД Зумрад Абдуллозода ва муовини сардори Раёсати ҳамкории байналмилалии ВКД Мансур Бухоризода иштирок намуданд.
Вазири корҳои дохилӣ Рамазон Раҳимзода Сафири навтаъйинро бо ин вазифаи пурмасъули дипломатӣ табрик намуда, дар иҷрои вазифаҳои хизматӣ комёбиҳои беназир таманно кард.
Дар ҷараёни вохӯрӣ Муҳаммадгул Залмай Юнусӣ изҳор дошт, ки таърих, адабиёт ва фарҳанги халқи тоҷику афғон муштарак буда, дӯстию рафоқат, бародарию ҳамҷаворӣ аз қарнҳои дур то ба имрӯз маншаъ мегиранд. Шаҳрвандони Ҷумҳурии Исломии Афғонистон, ки дар Ҷумҳурии Тоҷикистон буду бош доранд, аз бархурд ва муносибату муоширати хуби намояндагони полис изҳори қаноатмандӣ менамоянд.
Зикр шуд, ки ҳамкории пурсамар дар самтҳои мухталифи ҳаёти рӯзмараи ду кишвар, махсусан дар мубориза бо ҷинояткории муташаккил дар байни мақомоти умури дохилии тарафайн густариш ёфта, дар ин соҳа талошҳои муштарак роҳандозӣ мегарданд.
Дар ҷараёни мулоқот ҷонибҳо масоили мубориза бар зидди терроризм, экстремизм, гардиши ғайриқонунии маводи мухаддир, ҳифзи сарҳадот ва дигар масъалаҳои мубрамро мавриди баррасӣ қарор доданд.