24 март — Рӯзи умумиҷаҳонии мубориза бар зидди бемории сил: бемории сил табобатшаванда ва пешгиришаванда аст

ДУШАНБЕ, 24.03.2017 /АМИТ «Ховар»/. Рӯзи умумиҷаҳонии мубориза бар зидди бемории сил   бо қарори Ташкилоти умумиҷаҳонии тандурустӣ (ТУТ), ҳарсол 24 март дар тамоми ҷаҳон ҷашн гирифта мешавад. Ҳадаф аз гузаронидани ин рӯз пеш аз ҳама баланд бардоштани савияи огоҳии  аҳолӣ дар бораи паҳншавии глобалии ин беморӣ ва кӯшишҳои вобаста ба   нобудсозӣ, усулҳои пешгирӣ ва мубориза бо он мебошад. Чуноне, ки маълум аст, бемории сил дар Тоҷикистон яке аз мушкилиҳои асосӣ ва самтҳои муҳими  фаъолияти тамоми системаи тандурустии кишвар мебошад. Дар солҳои сипаригардида аз ҷониби Ҳукумати Ҷумҳурии Тоҷикистон якчанд барномаҳо оид ба пешгирӣ ва мубориза бар зидди бемории сил таҳия ва қабул гардидаанд. Дар баробари ин, аз тарафи Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо мақсади татбиқи барномаҳои қабулгардида тамоми чораҳои зарурӣ андешида шудаанд.
Дар робита ба ин рӯз мухбири АМИТ «Ховар» бо  Муъминшоҳ Латипов  сартабиби Беморхонаи шаҳрии кӯдаконаи бемориҳои сил ҳамсуҳбат гардид.
«Пеш аз ҳама бояд зикр намоям, ки бемории сил табобатшаванда ва пешгиришаванда аст,  ба шарте, ки он сари вақт ташхис ва таъиноти дуруст ба роҳ монда  шавад. Табобат ҳатман бояд  зери назорати корманди тиб гузаронида шавад. Ин беморӣ   асосан ба шуш осеб расонида, баъзан ба узвҳо ва системаҳои дигар низ асар мегузорад.
Соли 1882 дар Олмон Роберт Кох пас аз 17 соли кор дар лаборатория барангезандаи бемории силро кашф намуд, ки онро батсилаи Кох (БК) ва ё чӯбчамикроби Кох номиданд. Бояд гуфт, ки  бемории сил (БС) аз инсон ба инсон тавассути ҳаво ва оби даҳон паҳн мегардад. Ҳангоми сулфазанӣ, атсазанӣ ва ё балғампартоӣ бактерияҳои БС аз шахсони гирифтори БС ба ҳаво паҳн мешаванд. Барои сироятшавии инсон танҳо нафас кашидани миқдори камтарини чунин бактерияҳо кифоя аст. Тақрибан аз се як ҳиссаи аҳолии ҷаҳон дорои БС ниҳонӣ мебошанд. Хавфи гирифтори БС шудани онҳо дар тӯли ҳаёти худ 10%-ро ташкил медиҳад. Аммо ба шахсоне, ки системаи масунияташон заиф аст, мисли беморони ВНМО (вируси норасоии масунияти одам), нокифоягии ғизо, диабет ва ё тамокукашӣ, хавфи басе зиёди дучоршавӣ ба ин беморӣ таҳдид мекунад», қайд кард М. Латипов.
«Ба беморхонаи мо  аз тамоми шаҳру ноҳияҳои ҷумҳурӣ  кӯдакони сироятёфта барои табобат муроҷиат мекунанд. Дар соли сипаригашта  ба  беморхона 120 нафар кӯдакони гирифтори бемории сил ворид гаштанд, ки аз ин шумора  75 фоизаш   аз ноҳияҳои дурдаст ва   25 фоизи дигар  аз худи шаҳри Душанбе буданд. Бояд қайд намоям, ки он шумораи зиёди кӯдаконе, ки аз ноҳияҳо дар беморхона бистарӣ мешаванд,   яке аз сабабҳояш  хунукназарона  рафтор  кардани волидайн мебошад.  Ҳангоми бемор шудани  кӯдак, онҳо худсарона  муолиҷа мекунанду сари вақт ба духтурони минтақавӣ муроҷиат намекунанд.  Онҳо ҳангоме,  ки кӯдак ба ҳолати вазнин гирифтор мешавад, баъд ба духтур муроҷиат мекунанд. Аз ин рӯ,  то ба беморхона омада расидан, аллакай ҳолати кӯдак вазнин мешавад», -зикр намуд мусоҳиб.
Инчунин М. Латипов  кайд намуд, ки «Кӯдаконе, ки дар беморхона бистарӣ шудаанд, ҳаррӯз  бо хуроки гарм, ҳамчунин бо дорувориҳои зидди силӣ     дар давоми табобат пурра таъмин карда мешаванд. Ҳамаи таъминот дар беморхона пурра ройгон ба роҳ монда шудааст».
Бояд қайд намуд, ки солҳои охир дарёфт ва бақайдгирии шаклҳои гуногуни мутобиқгаштаи бемории сил дар Тоҷикистон ба қайд гирифта шудаанд. Мувофиқи маълумоти Ташкилоти умумиҷаҳонии тандурустӣ, Ҷумҳурии Тоҷикистон ба 27 давлате, ки нишондодҳои баланди шакли мутобиқгаштаи силро доранд, дохил шудааст. Мутобиқи натиҷаҳои тадқиқоти дар Ҷумҳурии Тоҷикистон гузаронидашуда, дар байни ҳодисаҳои нави бемории сил шумораи шаклҳои мутобиқгаштаи сил 13% ва байни беморони такрорӣ 54%-ро ташкил медиҳад.