Аз дуздӣ дар идораи букмекерӣ то сангҳои қиматбаҳои табиӣ

ДУШАНБЕ, 02.03.2017. /АМИТ «Ховар»/. Ба мақомоти милитсия аз ҷониби марди 43-солаи сокини шаҳри Бӯстон, соҳибкори инфиродӣ муроҷиат ворид гардид, ки шаби 12 ба 13-уми феврали соли 2017 шахсони номаълум бо роҳи пинҳонӣ аз дохили нуқтаи идораи «Букмекерӣ», воқеъ дар кӯчаи Рӯдакии ноҳияи Ҷаббор Расулов 1 ҳазору 661 сомонӣ маблағи пулӣ ва як адад телефони мобилии тамғаи «Самсунг»-ро дуздида, аз ҷойи ҳодиса ғайб задаанд.
Тавре аз Вазорати корҳои дохилии Ҷумҳурии Тоҷикстон хабар доданд, вобаста ба ҷинояти дуздии мазкур аз ҷониби кормандони милитсия зимни гузаронидани тадбирҳои фаврӣ-ҷустуҷӯӣ ду нафар писарбачаи ноболиғи 17-солаи сокинони ноҳияи мазкур дастгир карда шуданд.
Ҳамчунин дар натиҷаи гузаронидани чорабиниҳои фаврӣ-ҷустуҷӯӣ кормандони милитсия марди 52-солаи сокини ноҳияи Муъминободро бо гумони муомилоти ғайриқонунӣ бо сангҳои қиматбаҳои табиӣ дастгир намуданд.
Ҳангоми азназаргузаронии хонаи истиқоматии гумонбаршуда 5 адад сангҳои қиматбаҳо дарёфт ва мусодира карда шуданд. Мувофиқи ташхиси иёргарӣ 2 адади сангҳои мазкур лаъли асил ва 3 ададаш лаъли сурх мебошанд, ки вазни умумиашон 7,072 граммро ташкил медиҳад.
Нисбат ба ҷиноятҳои содиршуда корҳои тафтишотӣ идома доранд.