Дар Беларус Олимпиадаи байналхалқии санъат баргузор мегардад

ДУШАНБЕ, 15.03.2017. /АМИТ «Ховар»/. Ҷумҳурии Беларус хоҳишмандонро барои иштирок дар Олимпиадаи байналхалқии санъат «Куршинале-2017», ки баргузории он моҳи июли соли равон дар ин кишвар дар назар дошта шудааст, даъват менамояд.
Тавре аз Маркази матбуоти Вазорати фарҳанги Ҷумҳурии Тоҷикистон иттилоъ доданд, дар Олимпиада эҷодкорону санъаткорон ва гурӯҳҳои эҷодӣ новобаста ба синну сол аз кишварҳои гуногун, аз қабили Беларус, Россия, Қазоқистон ва Тоҷикистон иштирок карда метавонанд.
Мақсади асосии чорабинӣ муттаҳид гардонидани аҳли санъат ва фарҳанги халқҳои гуногун, оммавӣ гардонидани санъати ҳар як халқу миллати иштирокчии он мебошад.
Олимпиада дар номгӯи гуногун, ба мисли вокал, намоиши театрӣ, санъати тасвириву графикӣ, ҳайкалтарошӣ, адабиёт ва ҳунарҳои мардумӣ гузаронида мешавад.
Хотиррасон менамоем, ки дархостҳо барои иштирок дар даври асосӣ дар Олимпиада то санаи 31 марти соли 2017 қабул карда мешаванд.