Фархор: Анъанаву суннатҳои наврӯзӣ бо мазмуну шакли хеш манзури иштирокчиён мегарданд

ДУШАНБЕ, 16.03.2017. /АМИТ «Ховар»/. Имсол ҷашни Наврӯзи вилояти Хатлон дар ноҳияи Фархор баргузор мегардад. Дар ин бора Қарори раиси вилояти Хатлон Давлатшоҳ Гулмаҳмадзода ба тасвиб расидааст.
Яке аз масъулони ин барнома мудири маорифи ноҳияи Фархор Ғазалшоҳ Сафарзода дар робита ба вазъи омодагӣ зикр намуд, ки алҳол тамоми тадбирҳои омодагӣ дар доираи нақшаи тарҳрезинамудаи Мақомоти иҷроияи ҳокимияти давлатии ноҳия дар арафаи анҷомёбӣ қарор доранд. Фархориён талош доранд, ки ҷашни «Наврӯзи Хатлон-2017»-ро намунавору хотирмон баргузор намоянд. Қисмати театрикунонидашудаи намоиши наврӯзӣ аслан дар ихтиёри муҳассилини муассисаҳои таълимӣ қарор дорад. Масъулини қисмати мазкур талош доранд ҳама он анъанаву суннатҳои то ба имрӯз расидаи Наврӯзи ниёгонамонро бо тамоми мазмуну шакли аслиашон манзури иштирокчиён намоянд.
«Бо мақсади ба Наврӯзи ҷаҳонӣ шаҳомату мазмуни тоза бахшидан як зумра озмунҳои фаннию фарҳангӣ, аз ҷумла «Суханвар», «Донишвари умедбахш», «Ҳофиздонӣ», «Бедилдонӣ», «Шоҳномахонӣ», «Лоиқхонӣ», «Чилкокули фархорӣ»-ро ба таври муташаккил роҳандозӣ намуда, баъдан қисмате аз ғолибони озмунҳои мазкурро ба ҷашни «Наврӯзи маориф» даъват менамоем»,- илова намуд манбаъ.
Наврӯзи Хатлон дар варзишгоҳи шаҳраки Фархор баргузор мегардад, ки он дорои 10 ҳазор ҷойи нишаст буда, ба таври идона оро дода шудааст. Варзишгоҳи мазкур яке аз беҳтарин варзишгоҳҳои ҷумҳурист.